|| PHE-in a hnara leivung leh bawlhhlawh paih nasat vangah puh
Tun hnai ruah sur nasain Aizawl khawpui chawmtu Tlawng lui a tinu nasa a, tui thianghlim pump chhuah tur a tlem phah a. A nut chhan hi a hnara leivung leh bawhlhlawh paih nasat thin hrin chhuahah PHE department hotuten an puh.
Zirtawpni zing dar 4 vel atang khan Tlawng lui hi a nu nasa zual hle niin PHE department hotute chuan The Zozam Times an hrilh a, nimina tui nut dan an tehah Nephe lometric Turbidity Unit (NTU) 800 chuang a ni pha tih leh NTU 5 hnuai lam chu tui thianghlim a nih laia NTU sang tak a ni hian lui tui chu a thianghlim tawk lo hle tih a tihchian thu an sawi.
Greater Aizawl Water Supply Scheme Phase II hnuaiah Aizawl khawpui chhunga tui sem chhuah tur hi khawl pahnih hmangin pump chhuah thin a ni a, hetihlai hian tui a nut nasa avangin pump tlak a tam lo a, khawl pakhat chauha tui chu pump chhuah a ni.
PHE department hotute chuan lui tui pump chhuahte chu mipui in tlakin tihthianghlim thin a nih thu sawiin, hetia tui a nut nasat a, khawpui bawlhhlawhte luiah a luan luh nasat hian tui tihthianghlim a harsa a, a hmanrua pawh a ngai tam hle tih an sawi.
Mizoram chhunga kawng laihna leivungte chu kawrah paih thin a ni a, ruah a surin Tlawngah lei vung chu len thlain tui a tnu hle tih PHE department hotute chuan an sawi a, “Tun hnaia Aizawl chawmtu Reiek kaia Tlawng lui leh hmun danga Tlawng lui a nut chhan pawh leivung paih vang hi a ni,” an ti.
Aizawl chawmtu Tlawng lui pawhtu kawrah leivung leh bawlhlawh paih a tam thu sawi bawkin, a bikin Tlawng lui hnar lam, Vailui leh Serlui chhehvelah khawpui chhung miten bawlhhlawh tawp tak tak an paih nasa a, ruahtuiin tlawng luiah a len lut a, hei hian mipui in tur tui a tibawlhhlawh nasa tih an sawi rualin, Tlawng lui tui chu a bawlhlawh sawt hle tih an sawi.
Tlawng lui bawlhhlawh zel dan nan PHE department-a thawktute chu Reiek kawng luite leh kawr bulahte bawlhhlawh paih tur chânga an duty hial t\hin thu an sawi a, “Duty-te kan indah \hin a; mahse, inven sen reng a ni si lo,” an ti.
PHE department hotute chuan, Tlawng lui chu aizawl khawpui chhungtui tlan ber a nih avangin tlawng lui bakah a fintu lui tete humhalha tihbawlhhlawh loh a pawimawh thu sawiin, lui dung leh a chhehvelah leivung leh bawlhhlawh paih tawh lo turin mipui an ngen.
Nimin lama Tlawng lui nu nasa avangin tui pump chhuah tlem deuh mah se mipui hnena tui sem erawh a la khaihlak phah lo tih an sawi a, chutihrual chuan ruah sur zel a, a hnara bawlhhlawhte a luan luh tam zel chuan tui a thianghlim lo zel thei a, hei hian harsatna lian zawk a thlen thei tih an sawi bawk.