Bethlehem Vengthlang in final lut tura an mamawh point an thawk chhuak a, Durtlang lakah harsatna lian tawk lova chakin Zothan Autoworks Pro Volleyball League 2022 final an khel dawn.
Thawhtanni zan a R Dengṭhuama Indoor Stadium a Pro Volleyball hmeichhe inelna inkhelah Bethlehem Vengthlang hian Durtlang chu 25-18, 25-22, 27-25 (3-0) in an hneh.
Bethlehem Vengthlang chakna kawngah Elisian Medai chuan filawr takin a khel leh a, point 23 hmuin tum ruk a tisual a, vawi hnih a khelh tawhah team chakpui ve vein D3 Business Player of the Night lawmman a dawng zawn.
Pro Volleyball hnuhnung ber 2019-a player tha ber Lalmuanpuiin point 13 thawk chhuakin point kua a hloh a, derthawng lovin inkhel an thunun thei.
League vawi thum an khelhah tum hnih chakin hmeichhe team tha pali inel zingah pahnihna an ni a, Elisian-i tel lova set la miah lova an hneh loh tawh Bungkawn nen Ningani zanah final an khel ang.
Durtlangin point khat tal thawh chhuah tuma an beihna a hlawhchham a, champion lai ni chhunga league vawi thum an khelhah tlawm vek chungin an tla a, team pali inel zingah an hniam ber. Kumin Pro Volleyball-ah mipa lamah champion lai ni chungin vawi li an khelhah Chhinga Veng Spikers an tlawm vek a, knockout round lut pha lovin an tla tawh bawk.
Bethlehem Vengthlangin set hnih an lak zawn hnuah 21-14-in hma an hruai a, player inthlak kualin Durtlangin an nawr let a, 24-24-in an nih rual. Mahse, ho deuha an hlah hnuah Elisian-i’n a vaw tla a, set hloh lovin Bethlehem Vengthlang an tlang.
Set thumna tawp lamah Durtlang captain CS Zonunmawii’n thawk lamah harsatna tawkin damdawi in panpui a ni a, a khelh chhungin point ruk a hmuh zahve a paih a, Lalramliani’n point 13 hmuin ṭum nga tihsual a neih laiin Lalrinthangi’n point hnih hloh mah se vawi riat a hlap tla a, chuti chungin set la zo lovin an tlawm a, Kanan nen final an thleng pha lo.