Texas chhim lam, United States-a primary school-a mi pakhatin silaia mi a pawng kahnaah zirlai naupang 19 zet leh puitling pahnih an thi.
Uvalde khawpuia Robb Elementary School hi naupang kum sarih leh 10 inkarte kaina sikul niin silai hmet puaktu nia hriat hi dan kengkawhtute an kap hlum ve nghal tih thuneitute chuan an sawi.
Silai hmet puaktu nia hriat hi kum 18 mi niin handgun, AR-15 semi-automatic rifle leh a mu tam tawk nena thawk chhuak niin chhuitute chuan an sawi.
Sikul a beih hma hian a pi pawh a kap niin an sawi bawk.
Tual chhung chanchinbute chuan helai bawr vel thova high school-a zirlai nia hriat a nih thu an tar lang.
Uvalde Consolidated Independent School District Chief of Police Pete Arredondo chuan an ram sanaa Thawhlehni chawhma dar 11:32 velah silai hi a kap tan niin a sawi a, chhuitute chuan amah chauhva che niin an hre bawk.
Texas Governor Greg Abbott chuan chuan silai kaptu, Salvador Ramos-a an tih hian sikul a luh hmain a pawnah a lirthei a hnutchhiah a, ‘rawng takin, tum bik pawh nei lovin’ a silai a hmet puak ta niin a sawi.
Naupang thi eng emaw zat hi tute nge an nih finfiah tawh a ni.
Associated Press news agency-in a tar lan dan chuan US Border Patrol thuneitu pakhatin silai puak thawm hriain sikul hi a pan nghal a, silai kaptu pawh a inphenna kar atangin ama kah hlum a ni.
Border Patrol hi sorkar laipui hnuaia mi niin US-a lawngchawlhna kaltlanga an rama lutte vengtute an ni a. Uvalde hi Mexico nena an inrina atanga mel 80 pawh tling lova awm niin Border Patrol station a ni.
Border agent pahnih chu silai hmetpuaktu nena an inkahnaah kah fuh an ni tih sawi a awm a. Pakhat hi a lu-ah kah a nih thu thuneitute chuan an sawi a, tu ve ve mah ngaihtuahawm an ni lo va, damdawi inah an awm mek.
CBS News chuan silai hmet puaktu hi body armour an tihin a inthuam nasa niin an tar lang a. May 14 pawh khan kum 18 mi thovin Buffalo, New York-ah hetiang chiaha inthuamin semi-automatic rifle nen nepnawi dawr a lo kap tawh a. Heng thil hi US-ah chuan awlsam taka lei mai theih a ni ve ve a ni.
School district superintendent Hal Harrell chuan sikul kum chu inkahna thleng avang hian a hun hmaa tihtawp a nih dawn tih a sawi.
White House atangin US President Joe Biden chuan inkahna thleng a hriat chuan a tichauvin a tina hle tih a sawi a, silai thunun a tul tih a sawi bawk.
“Naupang engzat fakauvin nge he thil hi hmu? An thiante thi lai an hmu a, indona hmuna awm ang mai an ni,” a ti a. “An thil tawn hi an dam chhungin an hre reng tawh dawn a ni,” a ti.
Biden-a hian White House leh sorkar laipui building-a an flag zar zawng zawngte chu Uvalde-a thil thlenga thite sun nan a ngul chanvea zar turin thu a pe nghal.
Sikul leh a hung chhunga silai chelek
US-ah hian sikula miin silai a hmeh puah chiam ang hi tun hnaiah a thleng zing hle a. Nikum chhung pawh khan vawi 26 zet a thleng niin zirna lama sumdawng pawl chanchinbu, EdWeek chuan a tar lang.
Miin sikula silai an hmet puah chiam a thlen fo avang hian ‘active shooter lockdown drill’ an tih pawh primary atanga high school thlengin school curriculum-ah telh a ni.
Sikula inpawng kahna thleng tawhah chuan kum 2012-a Sandy Hook Elementary School, Connecticut-a thleng kha a la rapthlak ber niin thi mi 26 zinga 20 chu naupang kum nga leh kum ruk mite an ni.
US-ah hian silai cheleka pawikhawihna hi a tam hrim hrim a. Centers for Disease Control and Prevention (CDC) chuan thla hmasaa an chhinchhiahna an tihchhuahah chuan kum 2020 chhung khan lirtheia chetsualna avanga American naupang leh tleirawlte thi zat chu silai chelekna avanga thi zatin a khum niin an tar lang.
Thawhtannia FBI-in report an tihchhuahah pawh silai kengin mi a luhchilhna ang chi hi kum 2020-a coronavirus hripui a len hnu atangin a letin a pung tih an sawi.