Ni li cham tura Mizoram tlawha lo zin, Union Minister of State for Railways & Textiles Darshana Jardosh chuan Mizoramin kawng tha a mamawh tih sawiin Mizorama rel kawngte pawh a hun taka hna thawh zawk a nih theih nan theihtawp an chhuah zel thu a sawi.
Thawhlehni khan BJP Mizoram State office, Upper Republic tlawhin party hruaitute nen an inkawm a. He hunah Jardosh hian inkalpawhna tha leh man tlawm zawka Mizorama bungrua a thlen theihna turin rel kawng a pawimawh tih sawiin, “Mizorama rel kawng pawh a hun taka hnathawh zawh a nih theih nan theihtawp kan chhuah zel a, heng bakah hian Mizoram chu international border-a awm kan nih angin heng hi kan ram hmasawnna tura a pawimawh avangin Mizoram hian kawng tha kan mamawh a ni,” a ti.
Mizoram tan BJP member-te chu theihtawp chhuaha hma la zel tur leh chumi atan chuan hmeichhia leh thalaiten nasa leh zuala tan an lak a ngai tih sawiin, “Kan prime minister, Pu Modi-a hian hmeichhiate hi a ngai pawimawh em em a. Tun hunah pawh hmeichhia union minister a dah nual a. Chubakah, hmeichhiate hamthatna tam tak PM Scheme kaltlangin a awm hi a lawmawm hle a, hengah hian hmeichhiate hian kan chanvo kan chan a pawimawh a ni,” tiin, hmeichhiate eizawnna pawimawh tak pakhat, handloom lamah nasa takin an lak mek thu leh an hmalakna tichak turin theihtawp an chhuah tur thu a sawi.
Party hruaitute nena inkhawmna hi BJP Mizoram State President a awm loh avangin Dr BD Chakma, MLA, State Vice President-in a kaihruai a ni.