Myanmar rama Roman Catholic hruaitute chuan Pathian an biakna hmun thleng thlenga nunau leh tar tlanchhiate chu sipaiten chhu zui lo turin an ngen.
Tun kar chhung khan hmeichhia leh naupangten an biak ina sahimna zawnga an tlan luh hnuah mi pali an thih bakah mi pariat velin hliam an tuar niin an sawi.
Sipaite leh sipai eptu infawmkhawmte chu tun hnai hian Myanmar khawchhak ramri hrula Shan leh Kayah state-ah an inhmachhawn deuh reng a, sipaite leh tual chhung sipai dawrzawn khat dawnin nunna an chân tih chanchinbu leh helai hmuna chengte hian an tar lang.
Civil mi sang tam takin an chenna in leh lo an tlanchhiatsan a, mi tam takin hliam an tuar bawk.
“Sacred Heart Church, Kayanthayar-a him duh vanga tlu lut civil mite beihna hian min hliamin kan rilru a tina hle,” tiin Cardinal Charles Maung Bo, Yangon Archbishop chuan Twitter-ah a tar.
He biak in hi Thailand ramria Loikaw district-a awm a ni a, Pathianni zan khan beih a nih vangin a chhe nasa hle.
“Rapthlak taka chetna, puak thei leh ralthuam liantham hmanga nunau hlauthawng tak tak beihna hian thihna leh inhliamna a thlen a. Hei hi a tawp a tul tawh. In zavaia chungah ka ngen e, he buaina hi tipunlun tawh suh u,” a ti.