Pakhatna: Nau i pai a, chhungkaw din in duh ve ve bawk Engtinnge i pasal i hrilh ang?
Naupai hian nangmahah harsatna em em a thlen lo a nih chuan dawhkan mawi takah ei leh in tur tui tak dahin mombati nen- romantic tak hnuaiah i pasal duh tak hnen ah khan Nunna thar pakhat chuan in khawvel a rawn luah-lum dawn ta tih hrilh ang che.
Chumi zawhah han pawm deuh vang vang la, a biangah mai ni lo – a hmuiah khan duhthawh takin fawp ang che. Aw, a van nuam dawn em! He hun hi hun hlimawm leh hun duhawm chungchuang a ni a, in nupa khan intheihnghilh leh tawh ngai lovang.
Pahnihna: Nau i pai a, i lawm em em a, mahse i pasal khan fa neih nghal a duh leh duh loh i chiang bawk si lova Engtinnge i pasal i hrilh ang?
Hmanhmawh thut thut lovin inpahniha inhahdam deuh hun leh inhnaih zual lai takin hrilh rawh.
Engemaw hna lak-lawh a neih chuan a zawh hun nghak te te la, in pahniha fa neih nghal mai inla tih chiah loh thu leh zawi muanga neih in tum dan te hrilhin mahse nau i pai reng mai tih i hriat chhuah tak thu hrilh rawh.
Hetah hian duhawm tak leh ngainat awm takin i tawng chhuak tur a ni thung. Tichuan, ani pawhin i thusawi te chu uluk taka ngaihtuahna hun a nei thei anga, a hnu lamah pawh boruak a kaltluan a beiseiawm hle a ni.
Chutih rual rualin, i rilru leh ngaihtuahnaa awm te bakah faneih i duh thu practicle takin sawi la, pa berin a la tihchiah loh vanga inthiamlohna ang chi nei lem lovin tha takin hrilh ang che.
Hetiang hi a nih chuan in in support tawn ve ve a ngai dawn a, tanpuina in mamawh chuan midang pun mai pawh a sual lem lo. Pa ber a ngawih vung vung tawh chuan nu ber tan tihngaihna a awm lo thin hle a, hetiang hi nupa nuna hun khirh ber a ni a, HMA-NGAIHNA atang chauha chinfel theih a ni.
Pathumna: Nau i pai a, mahse nau neih i la duh mai bawk si lo. Chutih laiin, I pasal-in hre ta se a phur dawn lutuk bawk si! Eng-tinnge i pasal i hrilh ang?
Ngawih vung vung thu awm hek suh. Hrilh ngei chu a ngai ta phawt mai. Hmeichhe thenkhat chuan pasal te hriattir loh mai hi kawng awm-chhun ni-ah an ngai a, chinfel dan tha tak pawh a ni mai thei.
Mahse, hei hi thil tha lo tak a ni. Thuruk pawimawh vawn reng hian nupa nun-ah nghawng tha lo tak thlenin, hun rei tak chhung in lo inhma-ngaihna leh inrintawnna zawng zawng kha a tibuai vek dawn a, Tin, thil ‘fair’ lo tak a nihna lai a awm thei bawk.
Hetiang hunah hian tlang takin, pasal te bulah nau i pai a, mahse NU han nih chu i la ngaihtuah chiah loh thu hrilh ang che. Hemi hma lawk hian pasal te hrilh hmaa nangmaha i chhan tur zawhna khirh ve tak takte chu : Engvanga fanau la awt lo nge i nih? Tih-tlak mai i tum tihna em ni? I pasal-in engtinge a ngaih ang? tihteah hian chhanna mumal leh awmze nei tak a awm ngei tur a ni.
NU ni turin i ti lui ngei ngei tur tihna a ni lova, rilru inhawng takin pasal te bula sawi a, inpahniha insawi dun a pawimawh. Hetiang thilah hian thutlukna hmanhmawh taka siam rum rum chi a ni lova, a hnu-ah inchhirna a tam thin vang a ni.
Engemaw hlauhthawnna chu a awm ngei ang, mahse fanau hmangaih lo erawh a awm theih loh thung. Thinlung mai ni lo i ngaihtuahna pawh i hman nasat a tul ang.