Mizoram Presbyterian Kohhran Hmeichhe rorel inkhawm vawi 11-na chu nimin khan Mission Veng Kohhran Biak Inah neih a ni a, fa nei tam tura inzirtirna kawngah hmalak an rel.
Rorel inkhawm hi Central Kohhran Hmeichhe Committee Chairman Sailuti’n kaihruaiin, bial hrang hranga agenda lut te ngaihtuah a ni a. Chhinga Veng Pastor bial atanga rawtna lut ‘Fa neih tam tura inzirtirna neih ni rawh se’ tih chu pawm a ni a, Central committee bawhzui tura dah a ni.
Heng bakah hian Social media hrang hrangte a tha zawnga hman tangkai dan inzirtir rawtna lutte, ‘Khawtlang nun siam thatna kawnga hmeichhia mawhphurhna’ tih chungchang booklet-a siama zir rawtna te chu pawm a ni a, a bawhzui hna chu Central Committee kutah dah a ni.
Central Committee atanga thla thar tawngtairual thupui atana rawtna lut hrang hrangte pawm a nih bakah Synod Hospital Durtlang leh John Williams Hospital, Lunglei Charity Fund atan tum khat thawhlawm pek te leh ram pum huapa awmni khama tawngai neih te an rel bawk.
Kohhran hmeichhe rorel inkhawmah hian report hrang hrang General Secretary, Asst. Secretary leh Treasurer report te ngaihthlak a ni a, 2022 – 2023 budget pawh pawm nghal a ni.
Kohhran hmeichhe Secretary report atanga a lan danin, January-December 2021 chhung khan Kohhran leh Branch Church 974 a awm a, chhungkua zawng zawng 1,15,572 atangin nitina buhfaitham tham ziah zaa 98.33 an ni a, nitina chhung inkhawm nei thei chu zaa 65.65% an ni thung.