- Reuben Lalnunthara Hnamte
Hun hi khawvela kana wm chhung chuan a pawimawh reng dawn a ni. Nitin ni a chhuak a, tlaiah ni a tla leh a, kan eiin kan in a, chutiang reng chuan khawvel hi kan hmangral dawn a ni a. Khawvel alo changkang zela, mihring kan pung zel bawk a, hun hi a hlu tulh tulh ni hian a lang a. A biktakin ram changkangah te phei chuan hun hi an hlutin awmzia a nei thui hle a. Keini ang ramah takngial pawh hun hian awmzia a nei tan ta hle a nih hi. Ram changkang te phei chuan Second tin mai leh minute tin mai hi an hlu em em ringawt tawh mai a. Hun hi pawisa a ni e tih hial tur khawpin a hlu lehzual ta a ni ber mai.
Hmanlai kan pi leh pu hunah kah chuan hun hi hlu viau bawk mahse, mihring kan la tlem a, kan la changkang nep bawk a, hun hlutna awmzia hi a minute leh darkar ang chuan an chhut kilhkelh hmel lem lova. An ni hunlai a an chhut dan berah chuan lo vah hun tih te, thlai chi thlak tih leh, buh tuh hun te kha apawimawh em em chu a ni a. Tunlai anga minute leh second thlenga a hlut dan nen chuan a in ang tawh lo maithei a ni. Nepoliana chuan “ Austrian ho kan hneh chhan chu “ minute 5 hlutzia an hriatloh vang mai a ni “ a ti a. Austrian hoten nuamtawl nan leh enghleh nei vak lova hun an hman lai khan; chu hun tho chu Nepoliana chuan a raldo mite a buatsaih sauh sauh a, indona mihrat khawkhengah a chher chho a, hun a hman that a zarah hnehna a chang ta a nih kha.
Mihring nuna hun pawimawhzia hi tuman an sawifiah pha kher lovang. Sap thufing chuan “ Hauhsakna hloh chu taihmakna hmangin a neih let leh theih a, hun hloh erawh chu chatuanin a neih let leh theih tawh loh “ an lo ti a ni. Kan damchhung hun tawiteah hian Pathianin a thlawnin hun hlutak min pe theuh a. Chumi hmang tangkai chuan hlawhtlin nan an hmang thin a. Hun hlut zia hrelo te erawh chuan an hun neihte chu mahni intih chhiata leh retheihna kalkawng a tan an hmang chawk thin a ni. Thalai tamtakte hian kan hun t ha kan chan fova; kan hun t ha neihte hi thil tha tih nan nilova, mahni intihchhiat nan kan hmang fo mai. Kan hun second khat pawh hi kan ko let leh thei tawh silova, chuvangin kan hun tha neihte hi tangkai taka hman I zir ang u.
Kan ram pawh hi kan changkang ve viau tawh laiin, hun hman thu ah hian kan la changkang tawk lo hle mai. Pawl leh engemaw thil tih: Committee leh function engemaw kan neih te hian a hun taka tan chat hi kan nei tlem hle a ni. Hei hian kan la changkang tawk lohna a tilang thei a ni. Ram changkangah chuan hun hi an ngaipawimawh em em mai a. UK kan kal tum khan kan Guide te khan buaithlak min ti thin ngawt ang. Keini chu a hu ho kan nih bakah a hun dik chat chat kha kan lo care em em silova, an ni lahin a minute leh second thlapin thjl engkim an lo ti si a, buaithlak chu min ti viau dawn a lo ni. Inhlawhnate pawh khung lamah chuan a darkar, munute leh second thlapin engkim an kalpui a, damlohna thil nilova tlai tih vel hi chu an hrethiam ve vak lo.
Kan Sorkar Office te hi han en ila, a hun taka office kal a bang ta hi chu an tlem viau maithei a ni. Thingtlang atang te, khawpui chhung atang ngei pawh a, thil pawimawh a dawr tur a mahni pawimawh kalsanin tul takin Office khawilai emaw han kal changte hian tam tak chu kan dawr turte lo awm lo; chhuanlam engemaw avanga Office kalo emaw, engemaw avanga office lo chhuahsan te an awm thin a. A dawrtum tana beidawnthlak tak tak hi a awm fo thin a ni. Ram changkang ang chu ni se, Office kal tlak lo leh ban tur kan tam ngawtin ka ring. Tu te pawh hi mihring tawh phawt chuan pawimawhna kan nei vek a, Pathianin mitin hi hun min pe theuh bawk. Chu mi kan hun hmangthiam a, hmang tangkai apiang mi nihlawh an ni mai.
Sualna khurpui, Drugs, zu, sex leh a dangte a kan tan fo na chhan te pawh hi kan hun hman thiamloh leh dik lo taka kan hman vang a ni fo. Tunlai thalai tam tak phei chuan hunawl hi an ngah lutuk a, chu chuan thil tha lam aiin sualna lamah nasa takin a hruai peng thin a ni. YMA motto zinga pakhatah chuan “HUN AWL HMAN THAT” tih hi a awm a. Hei hi a tawi tek tawk hle nangin awmzia a nei thui hle thung a ni. Kan hun neih te kan hman that chuan sual inrawlhna tur leh kan kalsualna tur tam takin min veng a ni. Nitina hnathawk peih lo a awm mai mai, cell phone khawih nileng ringawt te, Tv en nileng ringawt emaw, lengkual satliah ringawt te hian thil tha tak chu an thawkchhuak hran lo maithei a ni.
Nu leh pa te pawh hian kan fa te hi an naupan lai atanga time management fel tak kan siam sak a, chawei hun, lehkha zir, hnathawh hun leh mut hunte kan siamsak tlap chuan an puitlin hnuah pawh an zawm zel mai dawn a ni. Thufingte bung 22: 6 ah chuan : Naupang chu a kalna awm kawngah chuan zirtir ula, a upat hun pawhin a thlah lovang” a lo ti a. Hei hi a dik hle a ni. Chhungkua pawh hian time management fel tak siama kan in enkawl chuan chhungkaw tha tak leh mi hmantlak kan chherchhuak ngei ang. Tunlai naupang tena Mobile an khawih nasa lutukte hi sim tir an ngai khawp mai. Fa te awm tlei nan taka hman kan chingte hi sim atan ava tha em! Social media a kan hmuh fo, mobile games khelh nasat lutuk avanga naupang buai ta leh Doctorte tan pawha enkawl ngaihna awm lo an awm ta fo mai a nih hi.
Kan sawi tawh angin HUN hi a hlu a, khawvela kan damchhung reilote a Pathianin min pek hun hi tangkai leh tha taka hman I tum ang u. General Evangeline Boothi khan a thih hma in “ Ka hun kal tawh ah khan engemaw siamthat ngai awm ka hre lova, inchhirna tur pawh ka neilo” a ti hial a ni. Nu leh Pa te pawhin kan fa te’n an hun k al tawha inchhirna tur an neih loh nan an naupan lai atanga kaihhruaina fel tak kan neih a pawimawh a. Thalai te pawhin kan hun k al tawh a tha lo lai alo awm a nih pawhin a tlai hmain insiamtha ila, kan hmalam hun chu kan kutphahah hian a awm a. TUN hun zel hi kan chan a ni a, kan tun hun hi tha takin hman I tum ang u. Hun hman that hi hlawhtlinna, mi hmantlaka min siamtu leh kan damchhunga malsawma min thlentu a ni thei a ni.