Japan International Cooperation Agency (JICA) team chuan ni nga cham turin Mizoram lo tlawhin Thawhtanni khan Environment, Forests & Climate Change Department-in ‘Biodiversity Conservation & Forest Enrichment Project’’ proposal an siam chu a hmunah an enfiah.
JICA team hi Thawhlehni khan EF&CC Minister TJ Lalnungtluanga, Dr. K. Pachhunga, MLA leh EF&CC Dept, Horticulture leh Tourism department hotute nen thukhawmin zanah minister-in zanriah a buatsaihsak bawk.
Minister TJ Lalnuntluanga chuan JICA Team chungah lawmthu sawiin Mizoram hi hmasawn mek a nih thu te, tuna JICA project hmang hian bung thar a kai ngei a beisei thu te, ramin a mamawh em em tuihna humhalh leh lui dunga thing phunte chu he project hmang hian chak takin kalpui a beisei thu a sawi.
Mizoram hian he project hmang hian environment lamah hma nasa taka a sawn a rin thu a sawi bawk.
JICA atanga hotu kalte hi mi pasarih an ni a, Ningani leh vawiinah project neihna hmun tura thlante tlawh kualin vawiinah an let leh ang.