AC Milan striker Zlatan Ibrahimovic chu a khup hliam zai a ngai a, thla 8 chhung tal inkhel thei lovin a chawl dawn.
Kum 40 mi Swedish international hian tun season-ah AC Milan chu league title a chawipui a, kum 2011 hnua a vawikhatna atan Milan in Scudetto an la.
Milan team-ah mi pawimawh niin squad hmahruaitu nimahsela tun season bikah inhliam avangin a inkhel tam thei lova. A khup avangin training nei ngawrh thei lova awmin a indim a ngai a, a kheimit lamah hliam a nei bawk. Heti chung hian Milan tan goal pawimawh khung a thulh chuang lova, Serie A-ah match 23 khelin goal 8 a khung.
Ibrahimovic hian nipui ah contract a neihlai a hmang zo dawn a, Milan-ah hian season khat dang tal cham a la duh thu a sawi a, tuna a inhliam avang erawhin a hma hun engtinnge ni zel dawn tih zawhna a awm.