Manipur police-te chuan thalai pathum, India thenawm, Myanmar rama Covid-19 vaccine leh damdawi dang ken ruk tumte an man.
Police hian heng mite hi Pathiannia an man tawh kha a ni a, Covishield vaccine, Remdesivir injection leh damdawi dang thahnem tak chu Myanmar lamah hian lirtheia phurh an tum niin an sawi.
Singjamei police station Officer-in-Charge Inspector N. Jadumani Singh-a kaihhruaiten National Highway-2 hrul, Canchipur-ah, Heijingang Super Market bula lirthei kal vel an lo endiknaah heng mite hi an damdawi ken nen hian an lo man a ni.
Heng mite hi Mohammad Feroz Khan, 30, Imran Khan, 22 leh Shubham Kumar Anand, 23 te an ni.
Feroz leh Imran hi Manipur-a cheng nghet niin Shubham hi Katihar district, Bihar-a cheng a ni thung a, tun hnaiah Imphal-ah hian a khawsa thung.
Court-ah hruai nghal an ni a, Zirtawpni thleng hian police kawl tura tih an ni a, thu zawh fiah mek zel an ni.
Police hnena an inpuan tawh chinah chuan Moreh ramri atanga Myanmar luhpui tum an ni a. Police hian vaccine hi khawi atanga an neih nge tih te, mi dang inrawlh an awm thei em tihte an chhui zui mek.
India leh Myanmar hi an inkalpawh nasa a, khawchhak atang hian sikret, ruihhlo leh thil dang tam tak tawlhruk thin a ni nghe nghe.