West Bengal-a rorel lai, Trinamool Congress (TMC) MLA pakhat chu college a tlawhnaa principal thutnaa a thu lai thlalak a darh avangin titi a siam nasa hle a, sorkar pawh nasa taka dem phah a ni.
Ningania Nadia district-a thil thleng a darh hnu lawkah hian eptu, BJP chuan rorel lai party chuan sorkar enkawlna hnuaia awm zirna inte thuneihna an tichhia niin an sawi.
Santipur bialtu MLA, Braja Kishore Goswami chuan thuthar lakhawmtute hnenah tun hnaia Santipur College a tlawh lai hian principal-in a thutna kianin thu tura a ngen avang chauhva thu mai a nih thu a sawi.
Principal Dr Chandrima Bhattacharya hi thlalak darhah pawh hian langin MLA sirah hian sofa-ah a thu thung a ni.
Goswami chuan hetianga an thu lai hi tuin emaw lo lain social media-a thu vaivir tum hrim hrim leh amah beih nana hman tumin a thehdarh ta mai mai niin a sawi.
Thlalak darh chungchangah hian BJP state president Sukanta Majumdar chuan, “Hei hi West Bengal-a TMC rorelna hnuaia zirna kal dan leh awm dan dik tak pho lanna a ni. College principal meuh pawh rorel lai party MLA lakah chuan a bawhkhup a ngai a ni,” a ti.
Saffron party pawhin TMC chu na taka beiin an Facebook page-ah, “Hei hi Trinamool-in a duan chhuah new education model chu a ni,” an ti.
Principal Bhattacharya-i erawh chuan thil thleng leh thlalak darh chungchangah hian engmah a la sawi ve lo thung.