Maoist hel pawla an hotu lian, thubuai pawh 100 chuang nei, a lumanah pawh Rs. nuai 75 zet an chhiar, kum 55 mi chu Bihar-a Gaya district-ah Nilaini zan khan ram hnuaiah a ruang hmuh a ni tih police chuan an sawi a. Ani a awm lo ta hi Left-wing hel tan chuan pawi lian tak a ni tih an sawi.
Gaya-a Senior Police Superintendent Harpreet Kaur chuan Sandeep Yadav-a hi kum 30 chhung vel man tuma zawn tawh a nih thu a sawi a. Maoist-ah hian Bihar Jharkhand Special Area Committee-a an incharge niin Bihar, Jharkhand, Chhattisgarh, Orissa leh Uttar Pradesh-ah te thubuai a nei niin a sawi.
A thubuai zingah hian police leh palamilitary force-te beihna bakah ralthuam leh hmanrua ruk te pawh a tel niin Kaur-i chuan a sawi.
Yadav-a chhungte chuan hun eng emaw chen damlohnain a tlakbuai tawk a, inenkawlna tha a dawn si loh avangin damdawi eng emaw ngeih loh vanga thi niin police hnenah an sawi a. Anmahni pawh an hriat ngai loh miten an inah hian a ruang hi an dah niin an sawi bawk.
Venhim hnathawktute erawh chuan Yadav-a hi April thlaa an pawla ngaihdan leh hma lak dan tur ngaihtuahtu ber, Vijay Kumar Arya-a man a nih hnua an pawl chhunga ngaihdan inang lo awm avanga tûra hrai a nih an ring a. Arya-a man a nih hnuah khan pawl chhungah thuneihna inchuhna a awm niin an ring a, Yadav-a pawh hi hotu sang zawk ni tura rin hlawh a ni.
Kaur-i chuan Yadav-a ruang hi video-a thla la chunga post-mortem turin Ningani khan thawn a nih thu leh a thih chhan tak pawh hriat theih an inbeisei tih a sawi.
Enforcement Directorate chuan Yadav-a laka an chetna hmasa berah kum 2018 khan Gaya leh Aurangabad district-a a thil neih lak sawn theih leh theih lohte pawh, Rs. Nuai 86 man hu zet chu an lo hrensak tawh a ni.