Aizawl : Lawngtlai district hospital-a doctor 4 sawna, midang 3 dah an nih chungchanga CYLA-in doctor sawnna thupek sut tir leh doctor dah belh tura sorkar an kar mek laiin, tunkar Nilaini khan tun thla ni 20-a doctor pahnih sawnchhuahna thupek tihchhuah chu sut niin, doctor pakhat Lawngtlai district hospital-a sawnluhna thupek pawh sut tel a ni.
Nimin khan MNF party adviser Prof. LH Chhuanawma’n Health Minister thuchah kengin CYLA hruaitute a hmu a. Thu lawmawm ken a nei lo nia an hriat avangin YLA chuan lungawilohna lantir chu an chhunzawm zel dawn niin CYLA hruaitu ten an sawi.
MNF party adviser Prof. LH Chhuanawma chuan lungawihlohna lantir ti tawp tura Health Minister-in a ngen thu te, Lawngtlai district-in a mamawh anga doctor dah chu tunmaiah tihhlawhtlin harsa a nih thu leh sorkarin ngaihpawimawh hmasaka a neih tur thu Health Minister-in a sawi thute CYLA hruaitute chu a hrilh a. Health Minister atanga ngenna an dawng chu lawmawm an tih rualin, mipui tan lungawina leh thlamuanna tur a awm loh avangin an thilphutte a hlawhtlin hma chuan sorkar an nawrna chu tawpsan an tum loh thu MNF party adviser chu an lo hrilh a ni.
Tarlan tawh thin angin CYLA hian Lawngtlai District Hospital-ah Specialist doctor dah belh tur leh Bungtlang South-ah doctor dah turin sorkar an ngen tawh thin a. Tun thla ni 20 khan Lawngtlai District Hospital-a doctor pahnih sawn an ni a, tun thle vek ni 23-ah doctor dang pahnih sawn leh niin, doctor dang pathum dah an ni thung. Tun thla ni 20-a doctor pahnih sawnna thupek chu tunkar Nilaini khan sut ni mahse, Lawngtlai dist hospital-a doctor dah thar 3 zinga pakhat chu hnuhkir tel tho a ni bawk.
CYLA hruaitute chu- an sorkar thil tih danah lungawina tur an hmu lo tih sawiin, a tul anga nawr chhunzawmzel an tum thu an sawi a ni.