Aizawl: Serchhip Thalai Pawl (STP) chuan Mizoram District Hospital hrang hranga doctor-te rualkhai zawka insemzai a tul thu an sawi.
Nimina thuchhuah an siamah STP chuan, Doctor transfer & posting order tihchhuah apianga lungawi lohna thawm hriat tur awm thi hi doctor sawn kual dan kalphung mumal awm loh vang nia an ngaih thu an sawi a. “District hospital tinah hian specialist doctor post nghet a siam hi thil tul hmasa niin kan ngai a,” an ti.
STP hian sorkar department dang ang bawkin doctor transfer & posting chungchangah kalphung mumal tak neih hi thingtlang mipuite leh doctor tam takte harsatna sutkianna tur nia a lan thu an sawi a. Hemi tur hian sorkar pawhin hma la se an duh thu sawiin, “Sorkar hnathawkte hi transfer theih an ni a, sorkarin an dahna hmun apianga awm tur an nih laiin, an aiawh dah lo a transfer an ni thin hian mipui harsatna nasa tak a siam thin a, a bik takin doctor-te transfer bikah phei chuan hetiang hi thleng tawh lo se kan duh a ni,” tiin sorkar an ngen.
Hetih lai hian Health Minister Dr R Lalthangliana hnena ngenna an lo thlen tawh angin leh Serchhip District Hospital atanga Gynae doctor sawn chhuah a nih bawk avangin Dr. C.Lalrinzama hi Gynae doctor atan Serchhip District Hospital-ah hian dah ngheh ni thei se an duh tih an sawi bawk.