Aizawl: Health Minister Dr R Lalthangliana chuan kum tam tak atang tawha ngaihtuah letin tun hnaia doctor indaih loh avanga harsatna hi la tawn ngai lo thil a nih thu a sawi.
Ningani khan Dr R Lalthlangliana hian doctor indaih lohna avanga sorkarin harsatna hrang hrang a tawh dante sawi fiahin, MPSC-in a remtih tawh doctor lak thar tur mi 16-te hi court case avangin la thei loa hun rei tak tunah a inchiah mek avang te, specialist (post graduate) zir tura kal thar mi 14 an awm avang te, doctor pension thar mi 12 an awm avang te, doctor chatuan ram pan ta mi pali an awm avang te leh ZMC-a doctor awm nghet ta mi panga neih belh a nih bawk avangten doctor indaih lohna a hring chhuak tih sawiin, “Hetiang hi kum tam tak atang tawh a ka’n ngaihtuah let hian kan la hmachhawn ngai lo,” a ti.
Tun hnaiah PHC pakuaa doctor awm miah lohnaah te doctor dah a ngaih avangin, senior doctor tak takte pawh hmun hla deuh hlaka an dahte ngai khawpa dinhmun buaithlak taka an din mek tih a sawi a. Doctor indaih lohna avangin hmun hrang hrang atangin mamawh anih thu te sawi anih thu leh he harsatna lian tak sukiang tur hian theihtawpin an beih mek thu a sawi a. “Tlemin hun a duh turah chuan ka ngai a; mahse, a rei lo thei ang bera heng harsatna sukiang tur hian sorkarin hma kan la a ni,” a ti bawk.
Hetih mek lai hian, doctor indaih lohna avanga sorkarin harsatna a tawh mekte hriatthiampui a, innawr buai lutuk lo turin mipui leh NGO te a ngen nghal tih a sawi bawk.