Aizawl: Lo neituten an thar chhuah hralhna kawnga buaina an tawhna fo Mizoramah oil palm chingtute tan kawl a êng tan a, tun hnaia a rah hralhna rate thar avangin an sum lakluh a let deuhthawin a pung.
Mizorama oilpalm chingtuten hun rei tak a rah an hralhna rate hniam taka a kal laiin, tun hnai khan Oilpalm Price Fixation Committee-in a leikhawmtu, Godrej Company-ten an leina rate chu Kg 1 Rs 10 ni turin a ruahman a, tun dinhmunah Mizorama oilpalm chinna hmunpui, Kolasib leh Mamit district-a a hralhna rate chu Kg1 Rs 10 a ni mek a ni.
Hei vang hian oilpalm chingtute chuan sorkar hmalaknaah lawmthu sawiin, hetianga oilpalm hralhna rate sang ta hian an sum lak luh a let deuh thawin a tipung tih an sawi.
Ni tin mamawh, hriak ei chi thar chhuaktu an nih avangin oilpalm huan siamah an phur thar hle tih lo neitute chuan sawiin, mi thenkhat chuan an huante zauh tumin hma an la mek a bawk.
Bungthuam leh Zawlpui khuaa oilpalm huan siamtu lo neitute chuan hriak ei chia India ram a intodelhna turin sorkar laipuiin beihpui a thlakna, NMEOOP scheme chu nikum September thlaa hawn a ni tawh a, he scheme kalpui ve tur hian Mizoram sorkar pawhin agreement an tifel vek tawh tih sorkar hotute hnen atanga an hriat thu an sawi.
Hetihlai hian vawiin thlenga agriculture department-in he scheme a la kalpui ve lo chu a rang lama hman a nih theih nan chak taka hma la tura an duh thu an sawi a, he scheme-ah hian oilpalm rah (ffb) man chu market rate-a innghat a nih tur thu leh a tlem berah pawh Kg 1 Rs 20 vel beisei a nih thu te, tunah pawh state dangah chuan Kg 1 Rs 22 a nih mek thute an sawi bawk.