Aizawl: Congress party chuan chhungkaw 2,000 chuangten eizawnna atana an hman, New Market building sak chhunzawm mai loh chungchanga helai hmuna eizawngte thlavang hauhna hun chu New Market-ah an hmang.
Inrinni zingkara hun hmanah thu sawiin H Rohluna, General Secretary, MPCC chuan Congress sorkar lai khan bazarpui chei that hna hi an bul tan a nih thu leh MNF sorkarin chhunzawm mai lohin kum khat leh a chanve tehmeuh mai pawisa awmsa hman nghal mai thei hmang phal loin, chhungkaw 2,000 chuangte eizawnna ngaihtuah miah loa a an lal zui ta chu pawi a tih thu a sawi.
H Rohluna chuan, “MNF sorkar hian he laia eizawngte a ngaihthah em avang hian chhungkaw tam tak economy a tichhia a, pawisa a awm rih lo ti thin mah se, Kamrula-te tan chuan an nei reng tho a nih tih hretu tan chuan an ngaih pawimawh zawng a nih loh vang mai a ni tih hi a chiang em em a ni,” a ti.
Congress party hi a sorkar leh a nih chuan hun hmasa lam ang bawkin Bazarpui hmun hi an ngaih pawimawh leh dawn tih sawiin, “He laia eizawng thenkhatte tuihawk nena in inchiahpiah hi kan phal ve dawn lo a ni,” H Rohluna hian a ti bawk.
Bazarpuia eizawngte thlavang hauhna hun an hmanah hian TT Zothansanga, General Secretary MPCC leh Rosiamngheta, AMC Councillor, Secretary MPCC te pawhin thu an sawi a ni.