Aizawl: BJP Mizoram State President Vanlalhmuaka chuan MNF party chu central lamah NDA zawm inti mah se, Mizoramah erawh Congress nena an inzawm hian NDA suak an nihzia a tilang chiang hle tih a sawi.
Thawhtannia party chhung inkhawm an pisa-ah neihah thu sawiin Vanlalhmuaka hian MNF sorkar chungchang a sawi a. “MNF party-in central lamah nasa takin NDA zawm intiin, an inti-BJP hle a; nimahsela, Mizoramah erawh Congress nen inmawngzawmin dawl zawrin Congress hmaah an zawr leh si hian NDA suak an nihzia a tilang chiang hle,” a ti.
Mizoramah chuan sorkarin mi retheite tan harsatna an siam thin a, BJP erawh chuan kuthnathawktute leh mi retheite tan hma lain hna an thawk thin tih sawiin, “Mizoram sorkarah kut hnathawktute hian an thawhrim rahte an hralh theih nan puihna dil thin mah se, an dil hlawhchham thin a ni tih hriat hian hmabak a thim hle. Grape chingtute harsatna sutkian dan tur hi rang taka ngaihtuah turin Mizoram sorkar ka ngen a ni,” a ti bawk.
Hetih lai hian BJP Mizoram Pradesh chuan vawiin hian BJP Mizoram State Office, Upper Republic-ah State Executive Meeting (Semi-Virtual) an nei dawn a. He hunah hian district hrang hrang atangin executive member-te kal khawm dawn a ni.