Motorsport chanchin a intlansiak ropui leh ngaihhlut zual pathum zing ami Monaco Grand Prix chu Pathianni zanah ruahin a tihbuai hnuah tlan a ni a. Tlankawng huhin intlansiak a nghawng thui a, Red Bull Racing in an khingpui Ferrari lakah ‘tactic’ an hmang hlawhtling a, an car khalhtu Sergio Perez chuan pakhatna a hauh.
Mexican driver hian pathumna atang tlan tanin hnehna a chang a, Ferrari car khalhtu Carlos Sainz chuan a dawt a. An pahnih hnungah world champion lai Max Verstappen leh a elpui Charles Leclerc te an tlan zo.
Monte Carlo-ah ruah
Monaco Grand Prix hi Monaco a Monte Carlo leh La Condamine kawtthler tel a duan Circuit de Monaco a tlan a ni. Kawng a chep a, a kual a, khawvel intlansiak hautak leh ropui ah an chhiar tel.
Ruahsur in intlansiak a tihmuhnawm zual a, Monaco khaw mi Charles Leclerc chuan tun season a Ferrari tihfo angin practice leh qualifying-ah an tlanchakna lantirin a hmasa ber atangin bul a tan.
Intlansiak dawna ruahsur nasa in engkim a thlak danglam a, formation lap vawi hnih tlan hnuah race control in a hlauhawm dawna a ngaih avangin tlan hun an ti tlai.
An tlan tan atanga lap 30-naah Mick Schumacher a chesual a, hei vang hian intlansiak tihtawp lailawk niin tlan tan leh a nih dawnin lap 78 tlan tur intlansiak chu hunin a daih tawh dawn lova. Darkar hnih intlansiak hunchhung tur ruat a la bang zawng chu tlan tir an ni a, a pumpuiah lap 64 car ten an tlan zo.
Ferrari car ten bul an tan tha, Leclerc-a’n hma a hruai nghal a, a hnungah Perez, Sainz leh Verstappen te an awm a, a fal chak.
Kawng a ro zel avangin Alpha Tauri khalhtu Pierre Gasly chuan wet weather tyre chu hma taka thlakin intermediate tyre a hmang a, risk a la. Hei Red Bull in an thlir reng a, Gasly a tlan theih avangin an ti ve nghal.
Perez-a’n a ke a thlak hmasa ber a, Ferrari in Sainz ko lut mahse kawng a ro that huna slick tyre pangngai hman a duh zawk avangin a thlak lo.
Lap hnih hnuah Leclerc leh Verstappen ten an thlak ve a, mahse kilometre 3.3 chauh a thui Monaco tlankawngah Perez a tlan chak tawh avangin Leclerc-a chhuah leh hma in a tlan pel hman.
Lap thum hnuah Ferrari in tihsual an nei – kawng a ro tawh avangin an car pahnihte a rualin an ko lut a, tyre pangngai an vuah. Red Bull in Verstappen an thlak sak ve zui a,Leclerc-a car ke a lum that hman loh bakah Ferrari in an ko luh hma avangin Verstappen-a’n pathumna a hauh phah a, a tawp thleng a hma pali an inpel tawh lo.