Environment, Forests & Climate Change Department-a Principal Chief Conservation of Forest (PCCF) Jitendra Kumar chuan Mizorama kawng sial hnathawktu, NHIDCL hnuaia hnathawh mekte a hmuna endik tur leh dan an bawhchhia a nih chuan an hnathawh lai a rang thei ang bera tawptir turin Divisional Forests Officer (DFO) te a hriattir.
NHIDCL-in Mizoram hmun hrang hrang – Seling to Zokhawthar, Keifang to Manipur, Lunglei to Tlabung leh Aizawl to Tuipang inkar kawngte an lai mek a, kawng an laihna leivung an paihten environment a tichhiaah ngaiin Social Activist Vanramchhuangi chuan NHIDCL hnathawh mek chu titawp turin PCCF hi a lo ngen tawh.
He thu kal zelah hian PCCF chuan nimin khan Aizawl, Champhai, Lunglei, Thenzawl leh Tlabunga DFO leh LADC leh MADC-a District Council Conservator of Forests-te chu NHIDCL hnathawhte a hmuna endik turin a hriattir.
PCCF chuan DFO-te chu NHIDCL-te chu Mizoram (Forest) Act, 1955 leh Forest (Conservation) Act, 1980 hnuaia dan awmte an bawhchhia em tih endiksak turin a ngen a, dan bawhchhiatna hmuh tur a lo awm palh a nih chuan an hnathawh lai chu a rang thei ang bera tawptir turin a ngen bakah Thawhlehniah an report chu thehlut turin a ngen bawk.
Tar lan tawh thin angin Social Activist Vanramchhuangi, Ruatfela nu tia hriat lar chuan NHIDCL hnathawh chu titawp turin PCCF hnenah ngenna a lo thlen tawh a, kar kalta Zirtawpni khan PCCF pisa kawtah ‘Silent Strike of Environment Justice in Mizoram’ a lo nei tawh bawk.
Nimin khan Silent Strike hi a neih chhunzawm a, chutihrual chuan PCCF-in DFO-te hma la tura a hriattir avangin chawhnu lam atang khan strike a neih chu a chawlhsan lailawk a ni.
Sorkar hmalak tumna chu ngawi renga ngaichan mai a tum lo a, a thlithlai reng tur thu leh a tul anga hma a lak chhunzawm zel tur thu Rautfela nu chuan The Zozam Times a hrilh.