Russian Foreign Minister Sergei Lavrov chuan President Vladimir Putin-a a damlo nia sawi awm chu a dik loh thu a sawi.
French TV-in an kawmnaah Lavrov chuan Russian hruaitu hi ni tin vantlang hmaah a inlan a, mi dangte pawhin damlo angin an ngai lo hrim hrim tih a sawi.
Kum 70 mi, Putin-a hi tun hnaiah chanchinbu hrang hrangah a hriselna dinhmun a hniam nia tar lan a ni hlawm a, a cancer nia sawi pawh an awm.
Lavrov-a an kawm hi Russia-in Ukraine a rûn meknaa Donbas region-a luh thuk zel laiin a ni.
Lavrov chuan Ukraine khawchhak lam lak hran chu Russia-in chhan tha tak avanga a ngaih pawimawh a nih thu a sawi.
President Putin-a hi vantlangah a inlan reng thu TF1 hnenah hian sawiin, “Damlohna emaw, taksa lama harsatna emaw a neih awm ang reng reng kan hmu ve lo,” a ti.
“Screen-ah inhmu thei ang a, a chanchin chhiarin a thusawi pawh in ngaithla thei ang,” tiin Russian foreign ministry pawhin an sawi zui bawk.
“Hetiang titu leng vel hi tuten emaw an thehdarh a, ni tin a tih turte ti thei vek sia hetiang thu thang a awm hi ka en liam mai mai a ni,” tiin Lavrov chuan a sawi.
British intelligence atanga an dawn nia an sawi chanchinbuten an chhuah chhawnah chuan kar hmasa pawh khan Putin-a hi a damlo nasa nia tar lan a ni a. Hetih rual hian Russian hruaitu dinhmun dik tak finfiahna a awm chuang lo va, amah hi pa invawng leh hrisel tak, infiamna pawh ngaina leh ti reng reng thin a ni thung.
February 24 atanga Russia-in Ukraine a runnaah hian UN chuan civil mi 4,031 vel an thi tawh a, mi 4,735-in hliam an tuar tawh bawk niin a sawi a. Indomite phei chu a zat hriat chiah loh thi leh hliam an tam tawh niin a tar lang a. Mi maktaduai 14 chuangin an chenna, an khua leh khawpui chu chhe remrumin an kalsan a ni.