Zu kan dapnaah wine kan man tel ve chauh a ni : Excise minister

Excise & Narcotics department (END)-in tun hnaia Aizawla Mizorama thar grape atanga siam chhuah wine thahnem tak an man avanga sorkar demna a nasat mek laiin Excise Minister Dr K Beichhua chuan zu an dapnaah wine man tel ve chauh an nih thu sawiin, grape chingtute tan sorkarin kawng tha tak hawnsak a tum thu a sawi.

Excise force-ten Champhaia grape thar chhuah atanga wine siam an man chungchang hian sawi zui a hlawh hle a, hemi chungchanga The Zozam Times-in kawmnaah Dr K Beichhua chuan sorkarin zu khapna a kalpui mekah Aizawl hmun laili Millennium Centre bawr velah ualau takin zu zawrh a nih thu report an dawn bawhzuiin hma an la tih a sawi.

Zu zawrhna hmun nia report an dawn an dapnaah cane beer 110, Royal Stag leh Vodka bottle 26, Korean zu Sozu bottle 137, dark wine bottle 16 te an man thu sawiin, “Zu an dah khawmnaah hian Mizorama siam wine-te hi a lo awm tel bawk a, an man tel ta a ni,: a ti.

Excise minister chuan zu khapna kalpuina tura duan Mizoram Liquor (Prohibition) Rules chu pawm ni tawh mah se a taka hman a la nih loh avangin MLP Act chu hman mek a ni tih sawiin, he act hnuaiah hian zu kaihhnawih hrim hrim chu khap a nih thu a sawi.

Zu zawrhna hmun an dapnaah Mizorama siam chhuah wine-te chu man ve chauh an ni tih leh wine man tum hrim hrima che chhuak an nih loh thu a sawi a, “Wine a awm leh awm loh pawh kan hre lo a, MLP Act kenkawh tuma thawk chhuak mai kan ni,” a ti.

Mizorama siam chhuah wine-te excise force-ten an man chungchanga sorkar puhchhiatna chungchang sawi tel bawkin, “Social media lama kuthnathawktute rah beh tuma inpuhna hi a dik lo a, sorkar rilru pawh a ni lo hrim hrim,” tiin a sawi.

Sorkarin Mizorama kuthnathawktute chu theihtawp chhuaha chawi kan a tum thu excise minister chuan sawiin, “Champhai leh Hnahlana grape chingtute pawh hi MNF sorkar hmasain nasa takin a lo pui tawh thin,” a ti.

Dinhmun laklawh taka awm mek grape chingtute chu sorkarin kawng tha tak hawnsak a tum thu a sawi a, MLP Rules 2022-ah wine siam leh zawrh phalna lam hawi tel lo mah se an hmasawn zelna turin kawng tha a ngaihtuahsak ngei a beisei tih a sawi.

Zu khapna kalpuina tura duan, MLP Draft Rules, 2022 chu April 28, 2022 khan cabinet meeting-in a pawm tawh a, sorkar gazette pawh tihchhuah tep a ni tawh tih a sawi a, “Gazette chhuah mai tawh turin hma kan la a, a endik ngaite kan endik leh anga, kar leh lamah emaw chuan gazette a chhuah theih a beiseiawm,” a ti bawk.