Bayern Munich striker Robert Lewandowski chuan German champion hnenah a hun a tawp tawh thu a sawi a, tun nipuiah club chhuahsan a duh thu a sawi chiang.
Kum 33 mi hian Bayern Munich hnenah kum khat contract a la nei a. Bayern sports director Hasan Salihamidzic chuan tun thla tir khan club chhuahsan a duh tih a hriattir tawh thu a sawi.
Tun dinhmunah Lewandowski hi Spanish club Barcelona nen sawizawm an ni mek.
Engtinnge a sawi?
Poland national team camp a awm mek Lewandowski chuan a hma hun zawhna a chhannaah, “Thil pakhat chiang tak a awm – Bayern a hun hi a tawp tawh. Tunhnaia thil thleng zawng zawngte ngaihtuahin tha taka kan thawhho zel hi thil beiseiawm a ni tawhah ka ngai lo.”
“Hei vang hian hralh ka nih mai hi club leh keima tan pawh a thil tha ber a ni tih ka hria.” tiin a sawi a.
“Bayern hi club fing leh zahawm tak an ni a, hei vang hian an hnena ka contract neihlai hi hmang zo tura min chelh luih loh ka beisei.” a ti.
Eng nge Bayern hovin an sawi?
Tunhnaiah Bayern president Herbert Hainer chuan a contract hman zawh hma chu an chhuahtir dawn lo tiin thu a lo sawi tawh a, Bayern in engtinnge hma an lak zel dawn tur la hriat loh mahse nem bik mai an tum lo.
Bayern CEO Oliver Kahn chuan an striker tawngchhuah dan chu a dem a, mahni hmasialah a puh.
“Robert-a’n hetia thil tih a thlan chhan hi han sawi vak tur pawh ka nei lo. Hetianga vantlang a thil sawi thin hi tu tan mah a thatna hmuh tur a awm lo.”
“Robert hian kum hnih chhung a zawnin footballer tha ber chawimawina a dawng tawh a, Bayern Munich in hetiang dinhmun a din theihna tura a puihna hi a hre tur a ni. Inngaihhlutna hi lehlam chauh atanga kal bik tur a ni lo.” tiin a sawi.
Engtin zel?Kum 2014 a Borussia Dortmund atanga Bayern Munich zawmtu Lewandowski hian an tan game 375 khelin goal 344 a khung tawh a. Barcelona chu a kalna tura rin hlawh ber nimahsela sum lamah harsatna an neih avangin a awlsam dawn lo tih anmahni ngeiin an lo sawi tawh a. Premier League club Chelsea leh Liverpool pawh sawirik an ni tel.