Chief Secretary dan tum chungchangah kan hmin kim lo
Chief Secretary atan Mizo ngei dah duhna avangin NGO coordination committee (NGOCC) chuan chief secretary ni lai Renu Sharma chu a pisa kai tur dan an tum thu an auchhuahpui hluai a, sawizui a hlawh hle. Mahse, CS ber hi a awm lo nia sawiin, an thulh leh thu an puan chhunzawm ta mai pawh a.
NGOCC lam hian sorkar laipuiah vawiduai lo Mizo CS an duh thu an thlen tawh nia insawiin, hlawhtlinna an hmuh mai loh avangin hetia chet tum ta mai ni hian an insawi a, a Mizo IAS lam hian an daih meuh lo zawk erawh ni chuan a hriat a ni.
Kan tlawmngai pawlte hian ram leh hnam tan thil tha tam tak an lo ti tawh thin a, mipui pawhin kan thlawp thin viau. Tun tuma an thurel leh thuchhuah siam erawh hi chu a sawngsawhlawt lo viau niin a lang a, ngaihtuahna an hman thiam phah a tul zawk hle niin a lang.
NGOCC GS, Central YMA GS ni bawk Prof. Lalnuntluanga chuan, “Mizo chief secretary a awm tur hian beisei theih a ni lo tih chu kan hmuhpui a; mahse, tling leh thei an awm chhung chuan ram leilung fate Mizo duhsak kan phut,” a ti a, Chief secretary ni mek chu a mi mal takin dona an nei lo tih sawiin, hetih rual chuan he dinhmun chelh thei tur Mizo IAS an awm reng lai leh sorkar leh mipui aw ngaithla duh lova sorkar laipui hmalakna chu zawm har an tih thu a sawi a; an kaihhruai mipui lam an hmin em tih erawh an ngaihtuah tel lutuk lo a ni mai thei thung.