European Union hruaitute chuan Russian tuialhthei an lak luh thin hmun thuma thena hmun hnih zet tihtawpna tura ruahmanna chu an pawm ta.
Hungary-in duh lo hle mah se tuipui kaltlanga tuialhthei an lak luh thin zawng zawng chu an titawp dawn ta tihna a ni a, pipeline hmanga an lak luh erawh a la pangngai ang.
European Council chief Charles Michel chuan tuna an pawm tak, Russia an hrekna tur hian Moscow-in indona atana an inhmanna tam tak a nghawng dawn niin a sawi.
Hrekna tur thar hi Brussels khawpuia an member ram 27-te thukhawmin Russia hrekna tur thawh rukna an duan zinga mi a ni a, an vaiin an pawm vek a ni.
EU-in ram dang atanga tuialhthei a lak luh zinga 27% leh boruakalhthei a lak luh zinga 40% zet hi Russia atanga an chawk luh a ni a. Kum tin a manah € tluklehdingawn 400 vel a pe ziah.
Tun tum bikah hian Russian boruakalhthei thawn chhuah hrekna tur lam a tel lo va; mahse, Russia atanga Germany thleng kaltirna tur pipeline siam hna thawh erawh chawlhsan rih a ni.
EU ramte hian an intawh khawmnaah hian Russian tuialhthei lak luh tihtawpna tur duan thar hi darkar tam tak chhung sawihovin an ngaihdan pawh a inang lo nuaih a, Hungary chu a dodaltu langsar ber a ni.
Michel chuan chawlhkar eng emaw zat chhung pipeline hmanga tuialhthei lak luh bik chu ngaihhnathiam a ni rih dawn a ni tih thuthar lakhawmtute a hrilh.
Hetiang a nih tak avang hian tuipuia lawng liana tuialhthei phurh luh bik chauh tihtawp a ni dawn ta tih a ni a; mahse, Russian ta an lei thin hmun thuma thena hmun hnih zet a ni tho.
Hetih lai hian European Commission President Ursula von der Leyen chuan an khapna hian a huam zau dawn tih a sawi a, Russian ta la lut tam ram, Germany leh Poland chuan kumin kum tawpah chuan an pipeline hmanga an lak luh titawp tura an intiam vang niin a sawi.
“A la bâng tur chu chhim lam Druzhba atanga lak luh 10-11% vel chauh a ni tawh dawn a ni,” tiin Von der Leyen-i chuan a sawi a. Hei hi Russian pipeline hmanga Hungary, Slovakia leh Czech Republic ramten an lak luh a sawina a ni.
European Council chuan tuna ngaihhnathiamna an neih pawh hi a rang thei ang berin a ennawn dawn tih a sawi bawk.
EU ramten Russian tuialhthei lak luh tihtawpna tur hi European Commission-in thla hmasaa a duan kha a ni a, anni hi member ramte hman tur dan duangtu a ni.
Hnialtu eng emaw zat an awm a, Hungary chu a langsar ber a ni a, anni hi tuialhthei an lak luh zinga 65% zet chu Russia atanga pipeline hmanga la lut an ni a. EU-in hrekna tur thar a duan pawh sawisel leh dotu ber a ni.
Tuipui hnaih ve lo dang, Slovakia leh Czech Republic te pawhin Russia-a an innghah tihtawp hun pek belh an dil bawk.