Delhi Health Minister Satyendar Jain chu Enforcement Directorate-in sum tichingpena puhna avanga an man hnuah court chuan June 9 thleng an kuta awm turin a ti.
Arvind Kejriwal-a sorkara health, home leh power ministry changtu, Jain-a hi Thawhlehni khan Rouse Avenue Court-ah inlantir a ni.
Special Judge Geetanjali Goel chuan ED kuta la awm tura tiin inphiarna lian zawk awm theite hai chhuah a nih theih nan an kuta an kawl a tul niin a sawi.
Court-ah hian Jain hi advocate senior tak, N Hari Haran chuan dinsakin Solicitor General Tushar Mehta chu central agency aiawhin a ding thung.
Court-in Jain-a laka thutlukna a siam hma lawk hian Delhi Chief Minister Arvind Kejriwal chuan ED-in a cabinet minister laka thubuai an siam chu thil lem a nih thu a sawi a, a sorkar chuan rinawm leh dik takin thil an ti a, eirukna chu an ngaizam dawn lo tih a sawi bawk.
“Court rorelna hi kan ringawt a, thubuai phuahchawp hi chu a dingchang dawn chuang lo, kawng dik kan zawh zel a ni,” tiin Kejriwal-a hian thuthar lakhawmtute hnenah a sawi.
January khan, Punjab assembly inthlan hmaah tawh Kejriwal-a chuan Jain-a hi ED-in an man dawn tih hriatna a lo nei tawh tih a sawi bawk.
Central agency hian kum 2017-a CBI thubuai ziah behchhanin Jain hi an man a. AAP hruaitu leh a nupui, Poonam Jain te chuan February, 2015 leh May, 2017 inkar khan an sum lak luhna hriat chian let aia tam, Rs. Vaibelchhe 1.47 zet an la lut niin an sawi.
Delhi minister hi Prevention of Money Laundering Act (PMLA) hmanga man niin Thawhtanni khan darkar li chhung thu zawh fiah a lo ni tawh bawk a, sum tichingpena an puhnaa an zawhnaah hian a chhang tha duh vak lo nia sawi a ni.