Larsap Hari Babu Kambhampati-a’n nimin khan Raj Bhavan-ah Rural Development department hotute kawmin, Mizorama Pradhan Mantri Awaas Yojana – Gramin (PMAY-G), ‘Ho- using for All’ scheme kalpui dan leh an harsatna tawh te a sawipui.
PMAY-G hnuaia in sak tanpuina Mizoramin a kalpui dan te chu RD deptt. Secretary R. Zarzosanga leh Sy. Secretary Zoremthara Ralte ten Larsap chu an hrilhfiah a. Larsap chuan Mizoramin In sak tanpuina hmanga chenna in tha tak mi tam tak tan a sa leh hemi atana inhmunah te harsatna a awm lo chu thil lawmawm tak a nih thu a sawi a. PMAY-G hmanga in sak sak a nih zawh rualin chenna ina awm tur thil pawimawh dangte pawh convergence kaltlanga sch- eme hrang hrang hmanga awm thei tura beisei a nih thu Larsap chuan a sawi.
Larsap chuan “RD chu nodal department a nih angin hmalatu a ni tur a ni a, RD-in convergence kaltlanga a thawhpui tur department te pawhin tha takin RD an thawhpui a ngai a ni” a ti a. SECC 2011 hnuaia in sak mek te tha taka zo thuaia, AWAAS Plus hnuaia in sak hna thawh tur pawh tan thuaia, fund tam zawk Mizoram hmasawnna atana nawrchhuah tum turin RD hotute chu a chah bawk.
RD Deptt. hotu ten Larsap hnena an hrilhfiah danin, PMAY-G scheme kum 2022 a tawp tur chu kum 2 dang atan pawhseih a ni a, permanent wait list hnuaiah insak tanpuina dawng turin chhungkaw 13533 ziahluh niin, 13532 tan in sak tanpuina sanction a ni tawh a, heng zinga in 5511 chu sak zawh tawh niin, in 8021 la sak mek a ni.
RD chuan survey nei tha leh vekin in sak tanpuina mamawh tam tak an awm tih a hmuh belh a, heng in sak tanpuina dawn mamawhte hi AWAAS Plus software hmangin a thehlut leh tawh. AWAAS Plus a thunluh list 25539 zinga 6980 chu central-in allocation/target a siam tawh a. PMAY-G Awaasoft permanent wait list hnuaia in sak hna zawh a nih veleh thawh tan a ni ang. Awaas+ hnuaiah sorkar kum 2021-22 chhungin in 6980 sak leh hman tum a nih thu an sawi bawk.