Mizoram Board of School Education (MBSE)-in nimin khan Higher Secondary School Leaving Certificate (HSSLC) Examination, 2022 result a tichhuak a, zirlai exam beitu 11,908 zinga 9,773 (82.07%) an pass a, nikum aiin kumin pass percentage 5.73-in a hniam zawk.
HSSLC Examination, 2022 result hi online hmanga tihchhuah a nih bakah tih dan thin angin Chaltlanga MBSE Office tualah tar chhuah a ni a, result bu hi lei theih tura zawrh chhuah a ni.
Kumina HSSLC Examination-ah hian zirlai exam beitu 11,908 zinga mi 9,773 an pass a, hei hi za zela 82.07 a ni a, nikumah khan pass percentage chu zaa 87.80 a ni thung.
Distinction-ah mi 821 an pass a, first division-ah 4,058, second division-ah 3,559 leh third division-ah 1,335 an pass a. Fail 2,068 leh compartmental chance nei 76 an awm bawk a ni.
Arts subject bikah chuan Synod Higher Secondary School zirlai, Lalrohlui Ralte d/o Lalduhawma Ralte, Durtlang Leitan chuan mark 500-ah mark 462 hmuin a pum puiah pakhatna a ni.
Arts subject-ah hian zirlai exam 9,007 zinga 7,586 pass-in pass percentage chu 84.22 a ni a. Compartmental chance nei zirlai 58 an awm a, hlawhtling zo ve ta lo zirlai 1,363 an awm bawk.
Science subject-ah pawh zirlai exam 2,212 zinga 1,667 an pass a, pass percentage chu 75.36 a ni a. Compartmental chance nei zirlai pariat awmin, hlawhtling zo ve ta lo zirlai 537 an awm a ni.
Aizawla St. Pauls Higher Secondary School zirlai, Simon Lalremsiama Shangpliang s/o Kyrshanbor Shangpliang, Falkland chu Science subject-ah pakhatna a ni a, mark 469 a hmu a, kum 2020 HSLC examination-ah khan pakhatna a lo ni tawh bawk.
Commerce subject-ah chuan a pum puia mark 462 hmutu, Aizawla Oikos Higher Secondary School zirlai, Mercy Laltlansangi d/o C.Zonunthara, Khatla East fanu chu pakhatna a ni.
Zirlai exam 689 zingah 520 an pass a, pass percentage chu 75.47 a ni a. Compartmental chance nei mi pakhat awmin, hlawhtling zo ve ta lo zirlai 168 an awm bawk.
Result tihchhuah taka complaint neite tan ni sarih chhung hun hawn a ni a, June 7, 2022 thleng complaint a thehluh theih a ni.
HSSLC Examination, 2022 neih a nih chhung khan Covid-19 kai, exam tluan thei lo zirlai 127 an awm a, heng mite tan hian a bikin exam hun buatsaih a ni dawn a; compartmental exam rualin exam-tir an ni ang.
Offline-a class kal chhiat phah lem lo
Online Class kalpui chu a chhiat phah lo tih a sawi a, offline tluk thoah a ngai. Topper ni turin theih tawp a chhuah a, a beisei ngam chiah lo thung. Ni khataah darkar 10 chuang lehkha a zir thin a, Central Services-a inziah tlin a rilruk.
- Lalrohlui Ralte, Arts topper
Offline class kal thei lo mah se a zirlai a tihbuai phah lo a, nileng deuhthawin a zir a. Pawl 12 zir chungin online-in engineer zir turin coaching a kal a. Software engineer nih a tum. HSLC 2020 result-ah pakhatnaa a ni bawk.
- Simon Lalremsiama Shangpliang, Science topper
Online class chu nuam a ti zawk mah a, offline-in kal ta se a tihchhiat zawk hial a ring a. Topper a nih a inbeisei lo a, top ten-a inhlan kai erawh a inbeisei thung.
- Mercy Laltlansangi, Commerce topper