Mexican racing driver Sergio Perez chuan a team Red Bull Racing a cham chhunzawm zel turin contract a ziak a. Kum 2024 thleng Red Bull tan hian a intlansiak ang.
Kum 32 mi Perez hian tun Pathianni a tlan Monaco Grand Prix-ah pakhatna a hauh a, tun season a drivers’ championship-ah pathumna a hauh mek.
World champion lai Max Verstappen-a teammate Perez hian tun season-ah intlansiak pasarih atang pakhatna a hauh hmasak ber a ni a, Verstappen nen an result a that thin avangin constructors’ championship ah Red Bull in hma an hruai mek.
Perez hian Formula 1-ah season 12-na a hmang mek a. Kum 2011 khan Sauber F1 Team atanga bul tanin McLaren a zawm hnuah Force India, a hnua Racing Point tia an thlak leh ta chu a zawm leh a. Kum 2021 khan Red Bull Racing in an lalut a, season liamta khan vawi khat pakhatna hauhin drivers’ championship-ah palina a ni.
Perez chuan, “Tunkar hi ka tan kar duhawm a ni a, Monaco Grand Prix a chak hi driver zawng zawng duhthusam a ni a, kum 2024 thleng he team ah ka awm dawn tih a chiang hi a lawmawm bawk.” a ti a. Team principal Christian Horner chuan Perez-a contract an ziahpui chu team tana tih tul a nih thu a sawi ve bawk.