Aizawl: India ram zalenna champhaphak vawi 75-na, Azadi ka Amrit Mahotsav lawmna kal zelah nimin khan Prime Minister Narendra Modi chuan sorkar laipuiin mipui dinhmun chawikanna tur scheme hrang hrang a neihte mipui hmaah puangin Himachal Pradesh khawpui, Shimla-ah hun a hmang a. Live-a pek niin ram chhung hmun 1,500 atangin an chhim a, Mizoramah pawh Vanapa Hall-ah Mizoram Legislative Assembly Speaker Lalrinliana Sailo hovin hun hman a ni.
Online hmanga prime minister thusawi puan chhuah hi Chief Minister Zoramthanga pawhin a pisa atangin a chhim.
Lalrinliana Sailo chuan mi tin hnena hmasawnna a thlen theih nan India sorkarin hma a la a, Mizoram pawh tel vein scheme hrang hrang hlawhtlinna turin sorkar leh mipui tan tlan a ngai tak meuh tih a sawi.
“Sorkar laipuiin atang programe leh scheme a lo kal a, mahni state-ah theuh state sorkarten a takin kan kalpui a, a hlawhtlinna tura nasa taka thawktu sorkar hnathawkten an titha hle,” a ti.
Vanapa Hall-a hun hmanah hian Aizawl DC Office, Rural Development Department, Agriculture Department, Indian Oil Corporation Ltd., Women and Child Development, UD&PA, PHE, Health leh Lead Bank aiawhten mipui hmasawnna tur sorkar laipui scheme leh programme an kalpuite puanzarna hun an hmang a. Beneficiary kalkhawmte hmaah heng scheme an kalpuite sawfiahin mipuiin an chhawr tangkai theih dan tur kawng an kawhhmuh a ni.
Aizawl DC Office buatsaih programmee-ah hian Planning Board Vice Chairman H Rammawi, Deputy Speaker Er Lalrinawma, MLA eng emaw zat bakah Aizawl Mayor Lalrinenga Sailo, Deputy Mayor R Thanglura te pawh an tel.