American investment group RedBird Capital chuan Italy champion AC Milan neitu nihna chu Elliot Advisors hnen atanga leichhawng turin inremna an nei.
Thla hmasa a kum 11 chhunga a vawikhatna atana Serie A champion nihna changtu Milan hi Euro tluklehdingawn 1.2 in RedBird Capital hian an lei fel ang.
RedBird Capital hi Premier League club Liverpool leh Major League Baseball team Boston Red Sox neitu Fenway Sports Group-ah pawh neitu nihna nei an ni.
Elliott Advisors hian kum 2018 khan Chinese sumdawng Li Yonghong hnen atangin Milan neitu nihna hi an la chhawng a. RedBird Capital in neitu nihna leichhawng mahse ‘minority stake’ an la nei dawn a, Milan board-ah an mi leh sa thu tur an la awm dawn bawk.
RedBird founder Gerry Cardinale chuan, “AC Milan chanchin ropui a kan tel ve tur hi kan ngaihlu hle a, Italy, Europe leh khawvel football a a hmun dik taka a kir lehna tura ke a penna kawnga kan tel ve tur hi kan phur tawh hle.” a ti ve bawk.