LBS Suzuki chuan khawthlir thar neiin thawhlehni tlaiah Millennium Center kawt, Dawrpui, Aizawlah Suzuki V-Strom SX 250 an tlangzarh.
Kawng chhiaa hman tlak, thui tak nuam taka inphur chung pawha tlan thei tura duan V-Strom SX adventure bike hi Aizawla tlangzarh a nih rualin mi pahnih hnenah an hralh chhuak nghal a ni.
Khuh hawngtu Info Bikes hotupa Vanlalmuana chuan kum ruk kal ta atang khan khawvel pumah bike bazar a inher danglam a, sports bike hralh tlahniamin adventure bike an lei nasa hle a ni, a ti.
Suzuki bike dang SX 250 leh Gixxer naked 250 engine hmang ve tho ni mah se adventure atan tha leh rin tlak tura siam a ni.
LBS Suzuki chuan Mizo thalaiten sports bike la lawm hle mah se bike hmanga zin leh kawngpuiin a pawh lohna hmun hrang hrang tlawh an intihhmuh chhoh zel a, chuvangin an hlawhtlinpui theih an inbeisei a ni.
Mizoramah Rs 2,34,491-a hralh chhuah a ni a, lei hmasa pahnih zinga mi MSA chuan : “V-Strom SX hi rei tak ka nghak tawh a, thui tak tlan pawha hahdam taka khalh theih ka duh vangin ka thlang a ni,” a ti.