Aizawl: Chief Minister Zoramthanga chuan nimin zing khan Chaltlang peng DIET kawng siam thar a hawng a; Aizawl chhungah ringawt pawh hmasawn belhna tur kawng siam that ngai hmachhawp tam tak a awm thu a sawi.
Aizawl khawpui chhunga kawng pawimawh tak pakhat siam thaa hman theiha hawn a ni ta chu lawmawm a tih thu sawiin Zoramthanga hian a sawi.
“Hmasawn belhna tur, siam that ngai leh hmalakna tur tam tak Aizawl chhungah ringawt pawh awmin, zirchianga kan zavai tana tangkai zual zawka hman dan, chei that leh siam that dan te ngaihtuah a tha a ni,” a ti.
Chief minister hian hmachhawp siamte hlawhtlinna hmuh nghal loh avanga hlawmchham tihna a nih loh thu a sawi a. Hmachhawp siamte hi hun reilo tea thawh zawh theih te, thawh hun chhung rei zawk ngai leh a hlawhtlinna hmu tur chuan kum tak tak chhung nghah ngaite a awm thin tih a sawi.
He DIET kawng siam that thar hna thawh nan hian a tirah UD&PA kaltlangin Rs Nuai 80.96 ruahman ni mah se, a daih loh avangin SEDP atangin Rs Nuai 103.82 dah belh leh a ni a. Heng sum ruahmante bakah hian a la daih loh avangin Rs Nuai 53.13 additional estimate siam belh leh a ni.
November 2, 2021 atanga hna hi thawh tan a ni a, April 28, 2022-ah zawh fel a ni.