Aizawl : Aizawl South II bialtu MLA Lalchhuanthanga’n nimin khan a bial chhunga Health care centre te a tlawh a, “Health department thuam chak a tul zia leh hmanrua an neih chhiat zia te ka hmuhin ka bial mipuite an khawngaihthlâk hlein ka hria” a ti.
Lalchhuanthanga chuan veng chhung level-a hriselna kawnga thawktute leh an hmanruate thuamchak a ngai hle nia sawiin, chak zawka hma la tura sorkar a ngen.
“Sub-centre leh clinic thenkhatah phei chuan lapua leh bandage takngial pawh an lo nei lova, min barakhaih hle zawk a ni” Lalchhuanthanga chuan a ti a. Kulikawna Aizawl South II Main centre; Kulikawn, Tlangnuam, ITI, Venghnuai leh Salem Venga Sub Centre bakah Mission Veng, Tuikhuahtlang, Model Veng, Thakthing leh Dam venga Health Clinic-ah te an mamawh zualpui – Refregirator, Steel Almirah, Book shelf, Office table, Fetal Droppler, BP Check na, Inbukna, Ṭhutthleng, Plastic chair, Water filter, Gas Cylinder, Drawer, Ban- dage leh Lapua te MLA fund atanga ngaihtuah sak theia a awm avanga lawmawm a tih thu a sawi. “An mamawh zawng zawng tihsak theilo mah ila a zualpui kan lo phuhru thei pawh hi a lawmawm a, an mamawh dangte pawh kan la ngaihtuahsak zel dawn a ni” a ti bawk.