Manchester United midfielder Paul Pogba chuan June thla a contract a neihlai a hman zawh hnuah free transfer in club a chhuahsan dawn tih Old Trafford club in an sawi chiang.
Kum 29 mi Pogba hian kum 2016 khan a hunlaia khawvela player manto ber ni turin Pound maktaduai 89 in Juventus atangin a chawr chhuahna club hi a zawm leh a. Beiseina sang tak nen lut mahse kum ruk a cham chhungin beisei ang a thleng lo.
Tun season-ah inhliam in a tihbuai avangin a inkhel tam tawk lova, first team tan inelna hrang hrangah vawi 27 a inlan.
United chuan Pogba chhuah tur thu hi sawifiahin an hnena hun a hman chu, “Mimal theihna ropui tak tak hmuh tur awmin thawm ring thin mahse United zinkawng khar a nih dan erawh thawm a ring lo.” tiin an sawi a.
“Football pet thiamna ril tak, goal mawi tak tak leh midang khung tura ball tha tak tak siamsakte kan hmu thin.”
“Kum 16 mi lek a academy zawm a, United tana game 200 chuang zui a, FA Youth Cup bakah trophy lian pahnih chawi theih hi fak leh chawimawi phu a ni hrim hrim.” tiin United in an player hi an thlah.Beisei pha lo Pogba
Kum 2009 khan Pogba hian kum 16 mi niin French club Le Havre atangin United hi a zawm a, kum 2011 a FA Youth Cup chawi United team-ah player pawimawh a ni.
Kum 2012 July a contract a hman zawh hma in senior team tan vawi sarih a khel a, Italy-ah Juventus lam pan a thlang.
Turin-ah season li hlawhtling taka a hman hnuah record ni turin United a zawm a. An tan vawi 233 inkhelin goal 39 a khung.
EFL Cup leh Europa League te chawi mahse Pogba hi khelmual chhung leh pawna a inpeknaah zawhna a awm leh thin a. Kum 2018 khan manager Jose Mourinho nen an inkar a that loh avangin vice-captain a nihna chu hlihsak a ni tawh bawk.