Aizawl : ZPM thalaiin Champhaia NH 6, KM 130 – 147.5 inkara kawng sialnaah ram neitu mi 15-te zangnadawmna lak tur aṭangin za-a 15 cut sak an ni tih sawiin, “The Mizoram land revenue rules 2013 ṭanchhana rem leh rem lova lo cut ngawt mai hi sum leh paia tuihal sorkar thiltihah kan ngai” an ti.
ZPM thalai chuan he kawng hi NH act 1956 hmanga laih a nih avangin MNF sorkarin ram neitute dawn tur zangnadawmna za-a 15 lo cut theihna dan an nei lo niin an sawi a. “High court thupek anga a sum cut zawng zawng a bo a bâng awm lova ram neitute hnêna pelet turin kan phut” an ti.
NH 6 sialnaah hian Champhai district huam chhûngah mai ni lo, Khawzawl district-a ram nei mi 29 leh Saitual district-a ram nei mi 24-te zangnadawmna dawn tur za-a 15 pawh cut sak an lo ni tawh tih ZPM thalai chuan an sawi a. “MNF sorkarin mi zangnadawmna dawn tur leh zêl rem leh rem lova a lo cut hi lungchhiatthlâk kan ti a; sum ngah sorkar inti hian mi sum dawn tur lo ît tawh lo tur leh an sum cut sakte a bo a bàng awm lova pelêt ngei turin kan phut a ni” an ti bawk.