American tleirawl beiseiawm Cori Gauff chuan a vawikhatna atan French Open semi-final a lut a. A hnempui Sloane Stephens lakah harsatna tawk lovin a chak thei.
Thawhlehni zana Roland Garros a inkhelah hian kum 18 mi Gauff hian 7-5 6-2 in Stephens hi a hneh a. French Open junior title la tawhtu Gauff hian senior champion nih theihna beisei a la ti nung zel.
Kum 2018 khan Gauff hian kum 14 mi niin Junior title hi a la a, hemi tum hian Stephens hian women’s singles final-ah Simona Halep a hmachhawn.
Kum 29 mi Stephens nen hian intluk tawk takin set hmasa berah point an inhmuh chhawk a. Mahse Gauff hian kum 2017 US Open champion service a break sak hnuah chan tha zawk a chang a. Set khatna a lak hnuah set hnihnaah harsatna lian a tawk tawh lem lo.
Gauff hi WTA Tour a inkhel reng chungin a lehkha zirlai a chhunzawm a. French Open khelh tan hma lawk hian high school atangin a zirchhuak hlawhtling.
“French Open semi-final luh nge high school graduate nih hi har zawk ti se high school hi ka ti zawk ang. Tennis khel a zinchhuak reng chunga school kal hi a hautakzia ka hrechiang.” a ti a.
Kum 14 mi ni a WTA Tour a khel tan Gauff chuan, “Player dang thenkhatin thildang buaipui lovin tennis-ah chauh an inthlurbing a, mahse hei hi kei chuan pawimawh berah ka ngai lo. Chuvangin high school tha taka ka zo hi ka ngaihlu hle.” a ti.
Gauff-i hmaah hian Martina Trevisan a ding dawn a, kum 28 mi Italian player hian Canadian tleirawl Leylah Fernandez 6-2 6-7 (3-7) 6-3 in a hneh.
World rankings a 59-na ni mek Trevisan hi ei leh in lamah taksa lam harsatna a neih avangin kum li chuang tennis khel tawh lo a ni a, kum 2020 atang Grand Slam khel leh tanin a vawikhatna atan Grand Slam semi-final a khel dawn.