Myanmar atanga dan lova Mizoram kaltlanga kuhva rah tawlh a nih avanga an thar chhuah kuhva hralh kawnga harsatna tawk mek, Hachhek Bial Kuhva Chingtu Pawl (HBKCP)-in an kuhva tharte chu Mizorama thar chhuah ngei a ni tih chianna tura certified-sak turin sorkar an phut.
The Zozam Times zawhna chhangin HBKCP Asst Secretary Kanan Lalhlimawma chuan Assam sorkarin Myanmar atanga kuhva lak luh khapa an dan meknaah an kuhva thar chhuahte pawh dan ve a nih phah tih a sawi a, tunah hian an kuhva leitu hnam dangten Assam lamah an phur thla thei lo a, kuhva rah ro tam tak a tawih chhiat phah tawh tih a sawi.
Heng an harsatna sutkian nan hian an kuhva thar chhuahte chu Mizoram atanga thar chhuah ngei a ni tih chianna turin sorkarin certified-sak thei se an duh tih sawiin, “Kan sorkar hotute hian Assam sorkar hi biaa kan harsatnate sawipui bawk turin kan phut a ni,” a ti.
Kanan Lalhlimawma chuan Mizoram chhunga kuhva chingtuten harsatna nasa tak an tawh laia India sokarin lak luh a khap kuhva ro tawlh chungchangah state sorkarin mit a lo siai thin chu tha lo an tih thu a sawi a, tun hnuah chuan dan loa kuhva tawlhte chu check a, man zawk turin sorkar an beisei tih a sawi.
Myanmar atanga kuhva rah ro tawlh chungchangah hian sorkar lai mai bakah eptu party-a MLA-te pawh dan dik loa thil tih chu an au chhuahpui an beisei tih a sawi a, “India danpui hnuaia thu tiam late hian dan phal loha thil tih hi an do ngei turah kan ngei,” a ti.
Tunlai hi kuhva rah an seng hun a ni a, an thar chhuahte chu state pawn lam sumdawngten leisak tawh mah se Assam-ah phurh thlak theih a ni lo a, an thar leituten man an tawk hial tih a sawi a, hemi avang hian kuhva ro thahnem tak chu a tawih chhe tawh tih a sawi.
HBKCP asst secretary chuan kuhva rah tuna la tangkhang mek chu Rs nuai 50 man bawr vel a nih thu sawiin, “Heng nuai 50 man hute pawh hi nakin lawkah chuan a tawih chhe leh mai ang tih a hlauhawm hle,” a ti.
Hachhek bial chhung khaw hrang hranga chengte hian kum 1964 bawr vel atangin kuhva hi an ching tan a, kum 1974 atangin a tam thamin chhing chhoin, 1980 velah an hralh chhuak chho tan.
Suma an chantir tan, 1980 atang khan tluang takin an hralh thei zel a; mahse, Myanmar kuhva tawlh a nasat zel hnuah erawh harsatna tawkin kuhva huan neia eizawngtu chhungkaw sang rualte hi an mangang tawh hle a ni.