Mizo professional boxer tha pahnih – Vanlalawmpuia leh F Zoramchhana ten Thailand-ah tualchhung boxer an hmachhawn dawn a. India ram pawna professional boxing an khelh vawi khatna tur niin LPS pay-per-view hmanga en theih an ni dawn.
July 2 hian Bangkok a Spaceplus-ah Mizo boxer pahnihte an inlan dawn a. The Fighter tia hming vuah inelna buatsaihah Thai boxer-te nen an inhnek dawn.
Professional boxing an luhchilh atangin India ramah vek Khuangthing fighter Awpa leh Cherhlun tlangval Zotea an la inhnek a, Bangkok-ah fiahna thar hmachhawn turin nasa takin an inpuahchah.
November 27 khan, Dawrpui, Aizawlah LPS Fight Night vawi hnihna buatsaih niin Mizo boxer pahnih an inlan ve ve. An inhnek hnuhnun ber ni nghalin Awpa’n mittlung takin a khel a, round nganaah Hyderabad boxer Suresh Pasham a knockout.
A bitumte na taka nawr thin Awpa hian professional boxing vawi li a khelh tawhah tlawm nei lovin tum thum a chak a, super lightweight-ah India number one ni mekin Thai leilungah Thai boxer Aekkawee Kaewmanee nen an intawng dawn a, a inhnek tawha hautak ber ni thei khingpui hmaah a ding dawn.
Awpa nena tawn hriat inthlau tak kum 40 mi Kaewmanee chuan vawi 40 a inhnek tawhah tum 24 hnehna changin knockout-in vawi 12 a chak a, vawi 16 a tlawm tawh.
A inhnek hnuhnun berah Zotea a che tha zo lo va, Aizawlah Sandeep Singh Bhatti nen round ruk an inbeih hnuin majority decision-in Punjabi boxer a chak a, professional a luhchilh atanga mittlung taka vawi hnih a chak zawn hnuah a tlawm.
Insiam thar leh tuma bei mek Zotea’n fiahna tling inhnek a hmachhawn dawn a, Thai boxer Yutthana Kaensa nen super bantamweight huangah round ruk inhnek tura tih an ni.
Kaensa hian professional-ah tum 21 hnehna chang tawhin vawi thum a tlawm a. Zotea tan inhnek awlsam a ni dawn lova, tlawm nawn a pawi dawn.
Thailand-a boxing buaipuitu TL Promotions leh India rama promoter tha ber ni mek Marine Pro Boxing Promotions huaihawt world boxing series, The Fighter show-a inlan tur Mizo boxer tha pahnih inhnek lai Mizoram leh India rama live telecast-a en duh tan LPS pay-per-view atanga pek chhuah a ni ang.