Andhra Pradesh-a Visakhapatnam-ah chemical plant-a boruak chhia put avangin hnathawk hmeichhia 80 vel an damlo mek.
Gas putna hi Visakhapatnam-a Atchutapuram-ah a ni a, ran damdawi lam siamtu, Porus Laboratories Pvt Ltd, hmunah a ni.
Anakapalle SP Gautami Sali chuan ‘hnathawkte hi an dinhmun a tha vek’ niin a sawi a, thi an la awm lo niin a sawi bawk.
Gas put hi khawi atang nge tih hriat chiah a ni lo va, eng nge a nih pawh hriat a ni lo va, Andhra Pradesh Pollution Control Board leh police thuneituten an chhui mek.
Porus Laboratories Pvt Ltd atanga put a nih an ring ber a. Forensic team chuan a hmun thlengin a putna lai hi an chhui mek a ni.
Damlote hi Acchutapuram-a mi mal damdawi in leh NTR Hospital, Anakapalle-ah dah luh an ni.
Andhra Pradesh Chief Minister YS Jagan Reddy chuan damlote hi tha taka enkawl turin thawktute a hriattir a, minister-te pawh a hmuna tlawh turin a ti.
Chief minister hian thil thleng chu chhuia a hnu zela a thlen nawn tawh loh nan hma lak a nih tur thu a sawi bawk.
Porus Laboratory-ah hian April thla pawh khan thil a lo puak tawh a, mi paruk an thi a, an vaiin kang hlum an ni a, mi 15-in hliam an tuar bawk a. Chhiatna thlenga thi chhungte hnenah state leh factory chuan Rs. Nuai 25 theuh a pe a ni.