India ramah darkar 24 liam ta chhungin coronavirus kai mi 4,041 hmuh chhuah leh hman niin thla thum dawn, March 11 hnua hmuh chhuah hnem ber ni a ni.
Ram chhung hmun tam zawkah hri leng avanga inkhuahkhirhnate hlih a nih tawh mek laiin hri kai hmuh an pung leh tan hian mi tam tak hlauhthawnna a siam.
India-ah hian mi maktaduai 43.17 chuangin Covid hi an kai tawh a, mi 5,24,651-in an thihpui tawh tih health ministry chhinchhiahnaah tar lan a ni a; mahse, World Health Organization (WHO) chuan thi hi hei aia tam fe a nih a rinawm thu a sawi.
Darkar 24 liam ta chhunga sample endik zinga 0.95% chuan hri an kai tih hmuh niin chawlhkar khat liam ta chhunga endik zinga a kai hmuh zat a pung hret bawk.
Hri a len tirh lama tuar na tak, Maharashtra-ah tun hnaiah Covid kai hi an pung leh hret hret tan a, tun karah hian endik zinga 8% chuang mahin an kai tih hmuh chhuah a ni.
State khawpui, Mumbai-ah chuan May thlaah khan a hmaa damdawi in awm zat aiin 231% zetin an tam zawk a ni.
India-ah hian nikum nipui lai khan Delta variant avangin hri a darh chiam a, hetih lai hian ni khata hri kai hmuh chu mi 4,00,000 chuangte a ni phak a, damdawi in bakah mi vuina thlengin indaih lohna nasa tak a thleng a ni.
Sorkar laipui chuan state panga — Maharashtra, Kerala, Telangana, Karnataka leh Tamil Nadu hnenah hri darh thar leh mek chu titawp tura tan la turin a ti a. Zirtawpnia lehkha state tin health ministry theuh lehkha a thawn.
Ministry tin hnenah hian Covid thunun turin ‘an dinhmun chu uluk taka thlithlaia a tul anga hma la turin’ an ti tih tar lan a ni.