American tleirawl Cori ‘Coco’ Gauff chuan Grand Slam final a vawikhatna atan a khel dawn a. Zanin dar 6:30-ah world number one Iga Swiatek nen an inkhel ang.
Kum 18 mi Gauff hian Ningani zan khan semi-final ah seeded ni lo Martina Trevisan chu 6-3 6-1 in a hneh a. Professional tennis a khelh hnua Grand Slam semi-final a khelh hmasak berah hnehna a chang nghal.
A khingpui tur kum 21 mi Swiatek hian final kawng lehlamah 6-2 6-1 in seeded number 20 Daria Kasatkina a hneh tawh a. A zawna vawi 34 a chakna niin Grand Slam final a luh vawi hnihna a ni a, Polish nula hi set khat chiah kumin Roland Garros-ah a la hloh a, champion tura rin hlawh tak niin Gauff nen an inkhel a hmuhnawm dawn.
Kum 15 mi lek ni a Wimbledon a tennis legend Venus Williams hnehtu Gauff hi seeded number 18 a ni a. Trevisan lakah hian chak zawk tura rinkai a ni a, a hlawhtlin takah chuan kum 2001 a Kim Clijsters hnua Roland Garros a final lut thei naupang ber a ni.
Ningani zana inkhelah Gauff hian set hmasa zawk chu a khingpui nena point an inhmuh chhawk zat zat hnuah a la a. Break point an hman tangkai theih loh leh thin ve ve hnuah a tawp game hnuhnung pathum a la.
Set hnihnaah harsatna lian a tawk lo, chair umpire Marijana Veljovic in ‘line call’ a siam sawisel zeuh zeuh mahse zam phah lovin a tawp thleng a chungnung tluan.
“Ka dinhmun hi tunah hian sawi ngaihna pawh ka hre lo. Keimah pawh hian mak ka ti a, chuvang hian engtinnge han awm vak tur pawh hi ka hrethiam lo zawk.” tiin final a lut ta mai chu mak a tih thu a sawi.
Gauff hian hmeichhe doubles final a khel dawn bawk a, Zirtawpni khan Jessica Pegula nen inkawpin Madison Keys leh Taylor Townsend 6-4 7-6 (7-4) in an hneh.