Kumin NBA champion ni tura rin hlawh Golden State Warriors in tun season NBA Playoffs-ah anmahni court-ah tlawm la nei lovin inkhel bul an tan a, quarter hmasa pathum chhunga an khel thlirin hnehna an chang leh mai dawn tih a lang.
Mahse a tawp minute 12 a lo thleng a, engkim a danglam. Chase Center-ah Boston Celtics in point 40 an score laiin Warriors in 16 chauh an score a, 120-108 in NBA Finals game 1-ah Boston an chak.
Warriors tan Stephen Curry chuan point 34 a score a, quarter hmasa berah 3 points vawi ruk a lut. Second half-ah erawh a kut a sa tawh lo hle.
Andrew Wiggins, Klay Thompson leh Jordan Poole ten point 20, 15 leh 9 an thawh.
Celtics ven nan erawh a tawk lova, an star player Jayson Tatum-a’n point a score teuh loh zanah Jaylen Brown, Al Horford leh Derrick White te an che a. Celtics player-ten ball an shoot theihzia an lantir. Anni pathum hian point 24, 26 leh 21 an score a. A bikin 3 points vawi 6 leh vawi 5 lut tu Horford leh White te hnehna an chan chhan an ni.
Horford a la tar lo
Boston Celtics palian tangkai Horford hian NBA-ah season 15 a khel tawh a, heng zinga 13-ah hian Playoffs boruak a la tem vek. Amaherawhchu tun tum hi NBA Finals a khelh vawikhatna a ni.
Celtics team-ah tawnhriat neitha tawh a ni chungin ‘role player’ pawimawh nih a hnaih tawh zawk a ngaih a ni a, mahse Game 1-ah a Warriors hnehna chhuhsaktu a ni.
Warriors tan quarter hmasa berah Curry a che na a, huntawp dawn lamah Horford hi a chhanglettu niin a tawpah a dingchang ta zawk.
Fourth quarter khelh tan a nihin point 12 in Celtics an la hniam a, Warriors hnehna chan tur a la ni. Tatum-a’n point a lak tam loh zanah ball semtu chan a chang a, Jaylen Brown-a’n hma a hruai thung.
Horford, White leh Marcus Smart ten 3 points lut turin remchang an hmu fuh thei hle a. Quarter hnuhnung berah hian Celtics in 3 points vawi 12 an shoot atangin vawi 9 an lut a, a vawiin inkhelah vawi 21 an lut.
Point 12 chauh a score chungin Tatum-a’n assist 13 a nei a. A thianten tha zawka ball an shoot theihna chhan a ni.
Al Horford chuan an chak hnuah, “Ka teammate-te khan ball tha nen min rawn hmu ngun a, Derrick White pawh khan shot harsa tak tak a lut hnem. Ball shootna remchangah ka awm fo thin a, kha kha min rawn hmu thin a, ka shoot apiang kha a lut mai.” tiin inkhel zawhah a sawi.