Union Home Minister Amit Shah-a hovin Zirtawpni khan Delhi-ah Jammu & Kashmir sorkara thuneitu sang te, army chief, venhimna leh hnuchhuina lama hotu lawkte chu tun hnaia Kashmir phaikuama mi firfiak chetna thleng nasa lutuk chungchang sawihovin an thukhawm.
Thutkhawm pawimawh tak hi bank manager leh mi dang pakhat thah leh an nih hnu lawka neih niin tun hnaiah Kashmir-ah hian tum renga mi beihna thlengah mi paruiat thah an ni tawh.
Jammu & Kashmir Lieutenant Governor Manoj Sinha chuan thutkhawma tel tur hian Delhi a pan a. National Security Advisor Ajit Doval, Army Chief General Manoj Pande leh agency danga hotu lawkte an tel bawk a, an zingah hian Border Security Force leh Central Reserve Police Force pawh an tel.
Ningani khan Kulgam-ah Hindu bank manager chu a pisaah pistol-a kah a ni a, a hnuah damdawi inah a thi a. A hnu rei vak lovah state dang atanga inhlawhfaa awm pahnih chu Kashmir phaikuam lailiah, an hnathawhna, leirawhchan siamna hmun atanga an haw lam chu mi firfiakin an bei leh bawk.
“An pahnih hian damdawi inah dah an ni a, pakhat zawk hi a thi ta nghe nghe,” tiin police chuan Twitter-ah an tar lang a. He thil hi Magraypora, Chadoora-ah zan dar 9:10 vela thleng a ni.
Thawhlehni khan Hindu hmeichhia, sikul zirtirtu chu helai hmunah tho hian mi firfiakten an lo kap hlum tawh bawk a. A hmain mi firfiakte hian police pathum, an duty loh laiin an kap hlum a, television actress an that bawk a, an vai hian Muslim vek an ni a. Heng thil hi anmahni bitum chata beihna ang chi niin kar hmasaa thleng vek kha a ni.
Heng thil a thlen hma hian Hindu sakhaw mi, sorkar hnathawk chu a pisaah mi firfiakten an kap hlum bawk a, a kaptute hi Pakistan-a hmunpui nei, Lashkar-e-Taiba niin police chuan an sawi.
Shah hian Ningani khan Kashmir-a mi firfiakte chetna tam mek chungchang hi National Security Advisor Doval leh intelligence hotu liante a lo sawipui tawh bawk.
Kashmir-a hetiang thil thleng avang hian Kashmiri Pandit an tih, Hindu sakhaw hruaitute chuan an himna ngaihtuahsak vat an phut tih an sawi a. Ningani khan Srinagar leh Union Territory huam chhung hmun dangah lungawi lohna an lantir nghe nghe a. An zinga tam tak chuan an awmkhawmna hmun khar ni mah se phaikuam chhuahsan tumin hma an la mek hlawm.
“Sorkar hian min hreng a ni ber a, kan ina haw min phalsak lo va, kan vaiin kan hlau va. Kashmir-ah hian venhimna lama hlawhchhamna a awm mek a. LG (Lieutenant Governor) chu Jammu-a min kaltir turin kan ngen a ni,” tiin an zinga pakhat chuan online-ah SOS video a dah chhuak nghe nghe.
|||||||||||||\\\\\\
Congress chuan Zirtawpni khan state dang atanga Kashmir phaikuama pem lut leh Pandit-te tawrhna thleng chungchangah sorkar laipui chu na taka demin Kashmir chu ngai pawimawha ching fel thuai turin a ti.
“Vantlang tawrhna hi an tawrhpuia an mittui tlakna hi hruk rehsak a duh tak tak a nih chuan an harsatna hi ngaihven thuai rawh se,” tiin Rajya Sabha MP leh Congress hruaitu hlun, Vivek Tankha chuan Zirtawpni khan thuthar lakhawmtute hnenah a sawi.
Tankha chuan sorkar hotute chuan Kashmir Valley-a buaina awm chu ngaihven rang se a ti.
Kum 1990 chho vela Kashmiri Pandit-ten an chhuahsan ruih ruih chungchang chu Congress hruaitu hian sawiin, kum 30 a liam hnuah pawh BJP sorkar hian engmah chin felna a la nei lo niin a sawi a. Hei hi BJP-in Pandit-te an chhuah chhana Congress an puhna chu a chhang a ni.
Tun hnaiah inthahna thlengte hi Jammu & Kashmir-a political party hrang hrangte pawhin an dem thu an sawi hlawm.
National Conference chuan sorkar hlawhchhamna avangin venhim hna thawktu tam tak dah ni mah se mi thahna thleng a tawp thei lo niin an sawi a, tihtawp ngei a tul thu an sawi.
People’s Conference party pawhin inthahna thleng zut zut reng chu tihtawp ngei a tul tak zet thu an sawi.