Post mortem report atanga a lan danin, tunhnaia kahhlum Punjabi zaithiam lar tak Moose Wala chu silaia kah a nih atanga minute 15-naah a thi a, silaimu 19 zet a taksaah kah luh a ni.
Kum 28 upa hi May 29 Pathianni khan Mansa district, Punjab-ah misual tu tih hriat lohte’n chhun khaw en laiin a motor khalh laia chu an kahchilh.
Moose Wala taksa ding lamah silai kahna hnuhma a tam ber a; a kal, thin, lung leh spine te’n silaimu an tawng vek. A hliam tuar lovin minute 15 hnu lamah a thi niin, doctor panga awmna panel-in an tarlang.
Kahhlum a nih hmâ ni chiah khan Punjab sorkar chuan Moose-a hnen atangin sipai venhimna an lalet vek a, zaithiam leh politician ni bawk hian a tuk maiah misual kut tuarin a thi.
Pawikhawihnaah hian AN-94 assault rifle tiamin, silai pathum an hman niin a lang a, an chetna hmunah hian bullet asing ruak sawmthum hmuh a ni bawk.
Pawikhawihtute hi man an la ni lova, chanchin buatsaih lai hian rinhlelh mi eng emaw zat thu zawhfiah ni tawh mah se, hlin mai tur an la hre lo. Gang leader Lawrence Bishnoi bakah a thawhpui dang Goldy Bar te chu rinhlelh an ni mek.