Virginia court-in actor Johnny Depp lam hawia thutlukna a siam hnu-ah a nupui hlui leh khinglettu ni bawk Amber Heard-i chu intihhmingchhiat thubuaia zangnadawmna $Maktaduai 10 pe turin ti mah se, Amber hian heti zat sum a nei lo nia hriat a ni.
Depp Vs Amber te thubuai hi kar ruk zet ngaihtuah a nih hnu ah Ningani khan zawhfel niin, jury chuan Johnny Depp chu thiam chantirin, $Maktaduai 15 dawng turin thlu-tlukna a siamsak.
Hetih lai hian Amber Heard-i’n sum leh pai harsatna namen lo tawkin, zangnadawmna pe tur hian a tlin dawn lo niin, a lawyer chuan a sawi.
Depp nena an inthen vanga zangnadawmna $Maktaduai 7 a dawn atanga Amberi’n donation pek a tum pawh a tlak hlei thei lova, American Civil Liberties Union (ACLU)-a $Maktaduai 3.5 pe tura a intiam tawh pawh, tunah hian $Maktaduai 1.3 bak a pe thei lo. Kum 2019 khan sum lama harsatna vangin Amber hian ACLU-ah donation a pek a titawp lailawk.
Tarlan tawh angin, Hollywood actor pahnih te hi 2017 khan inthenin, thubuai chai chhung zawng hian an inkara thil thleng chipchiar leh boruak duh-awm lo tak tak hailan mawlh mawlhin a awm.
Fairfax, Virginia lam hawiin khawvel mipui tam zawkin mit an len a, ngaihtuahna an seng. Mr Depp leh Ms Heard te inneihna duhawm lo tak, a tawpna kha tak bawk si chu chiang lehzuala pholanin a awm bawk.
Mipui ngaihdan lakkhawm hrang hrnagah American tam zawkte’n Ukraine indona leh US Supremem Court-in nau tihtlak chungchangah thutlukna a siam tumna lam ai mahin courtroom drama an ngaihven zawk daih.
TV kaltlanga LIVE-a pekchhuah hian social media-ah view billion tam tak a nei reng a, khawvel hi a luahkhat a ni ber.
An inkar buai lehzualna hi 2018 khan intanin Ms Heard hian Washington Post chan-chinbu-ah In chhung khura kutthak tuar thin dik tak a nihna a ziak lang kua ta mai a. Amber hian a pasal hlui hi hming hmerin a tarlang lem lo. Mahse, a hun laia Hollywood star hlut hlawh ber ni pha ngat Mr Depp tan a chaw belh leih buaikna ang hlauh a ni thung.
$Maktaduai 50-in a khing ta rup maia a, a nupui hlui pawhin $Maktaduai 100 in a khinglet. California-a cheng an nih rualin, an thubuai hi Virginia county-ah ngaihtuah a ni daih thung. Hei hi Washington Post printing press innghahna hmun a nih vang a ni.
Anni pahnih ni 2011 khan ‘The Rum Diary’ film-ah intawng in, February 2015 khan an innei a, a hnu kum hnihnaah an inthen.