- Rinfela Zadeng
Genesis 1:1-2 kan chhiar chuan Pathian Thlarauin khawvel a awp tih kan hmu a; chumi hnuah chuan lei leh van chuan tuna a nih phung ni tur hian Pathian Thlarauin a awp hnu atangin bul atan tih kan hmu a. Chutiang chiah chuan Matthaia 16:12-20 kan chhiar chuan Lal Isua Krista kaltlangin kohhran hi din a nih tur thu Petera hnenah kan hmu a. Tirhkohte Thiltih bung 2 – ah Pentikos ni a Thlarau Thianghlim lo thleng chu vawiina Kohhran lo din tanna bul, a lungphum a ni tih kan hmu bawk.
Kohhran hi Thlarau Thianghlim hrin a ni
Kohhran chu Lal Isua zirtir te leh ringtu hmasa te intelkhawm thahnemngaiin an din a ni ngawt lo a; pawl satliah leh phur thuta din a ni lo tih a chunga Bible châng kan tarlan atang khian chiang takin kan hre thei. Lal Isua Krista chuan Kohhran a din dawn thu Petera hnenah a hrilh hnuah Pentikos ni a Thlarau Thianghlim lo thleng chuan Kohhran a hring chhuak tih kan hmu. Lal Isua zirtir mi satliah ve tak tak, len deng tute leh lehkha thiam lem lo te khan Lal Isua thih hnua Pentikos ni a Thlarau Thianghlim a lo thlen khan huaisenna an nei a. Thlarau Thianghlim tanpuinain hauisen taka Chanchin Tha hrilin Kohhran hi a lo ding a. Khami niah khan hnam hrang hrang inpawlh 3000 zetin Baptistma an chang tih kan hmu a (Tirh. 2:41); a tira mi 120 (Tirh 1: 15) lek te kha an lo pung ta hluai mai a ni. Kum zabi 1-na hun laia Rom Sorkar awp ram chhunga Juda hnam hrang hrang Palestina ram pawna mi te Jerusalemah Penitikos ni hian kût hmangin an lo kalkhawm a. Chu chu Thlarau Thinghlimin Kohhran dinna atan a lo hmang ta a ni. Thlarau Thianghlim thiltihtheihna kaltlangin hemi ni atang hian Kohhran chu din a ni tih kan hre reng tur a ni.
Kohhran tinung zeltu chu Thlarau Thianghlim a ni
Thlarau Thianghlim chuan Kohhran a din ngawt lo a; vawiin thlengin Kohhran hi a la chenchilh a, a la enkaw reng bawk a ni. Kohhran nung leh kohhran dik kan tehna ber pawh ‘Thlarau Thianghlimin a chenchilh em?’ tih hi a ni. Kohhran chhunga mihring te hian Thlarau Thianghlim tel lo chuan Kohhran kan din thei lo a, a tlu sawp leh nge nge thin. Thlarau Thianghlim chuan vawiin thlengin Kohhran min la chenchilh a, min chhawmdawl a, min ti chakin min tinung reng a ni. Chuvangin Kohhranah hian Thlarau Thianghlim a chen reng theihna turin kan sawmin kan au fo tur a ni. Thlarau Thianghlim tel lohna Kohhran chu – pâwl satliah emaw inhmuhkhawmna satliah mai emaw a ni ang a, rei a daih thei ngai lo ang.
Kohhran chu Thlarau Thianghlim hruaia kal zel tur a ni
Kohhran nunna, Kohhran hringtu leh enkawltu chu Thlarau Thianghlim a nih tlat avangin Thlarau Thianghlim hruaia kal zel hi Kohhran tihtur a ni. Kohhran Upa, Kohhran Committee, Kohhran mipui leh Pastor te hian Thlarau Thianghlim thuawih chung zelin Kohhran hi kan enkawlin kan humhalh zel tur a ni. Tu mimal duhdan leh ngaihdan emawa Kohhran hi enkawl tur a ni lo a; Kohhran mipuite pawhin Thlarau Thianghlim kaihhruaina hnuaiah Kohhran hi kan bêl tlat tur a ni. Kohhran mi, Thlarau Thianghlim kaihhruaina hnuaia awm thei lo leh thuawih thei lo kan nih chuan Kohhran mi dik tak kan ni thei ngai lo ang. Kohhran kaltlangin Thlarau Thianghlim awmpuina, chenchilhna leh kaihhruaina hi chang zel thei tura keimahni lo inbuatsaih hi kan mawhphurhna a ni.
Kohhran hi Thlarau Thianghlim chenna leh awmna, Lal Isua din leh sak a ni a; Thlarau Thianghlim te lohna Kohhran chu pawl satliah ve mai a ni. Chuvangin Thlarau Thianghlimin min chenchilh zel theih nan Kohhran mi te hian kan thlarau nun i buatsaih zel ang u.