Aizawl: MZP-in Mizoram sorkar hnuaia hnathawkte pension kum tihsan tumna awm mek tha an tih loh thu sawiin, thalai hna zawng mek leh dil mekte tana kawng zau zawk a inhawn zel theihna tura pension kum tisang lo turin sorkar an ngen.
MZP executive committee nimina thukhawm chuan Mizoram sorkar hnuaia hnathawkte pension kum tihsan tumna awm mek tha ti lovin, tisang lo turin sorkar an ngen a. Tuna pension kum atana hman mek kum 60 chu la tha tawka an hriat thu an sawi.
“Tun hnaia Mizoram Subordinate Services Selection Board (MSSSB)-in combined graduate level exam a buatsaiha hna hrang hrang lakah Mizo dik tak tling leh tlak an awm laiin hnam dang pathum lak tel an ni hi pawi kan tiin, kan ngai thutak hle,” MZP chuan an ti a. Tun hnuah Mizoram sorkar hnuaia hna lak reng rengah a tling leh tlak rau rau zingah ram leilungfa, Mizo dik tak duhsak zel tawh turin an ngen.
Nimina MZP executive committee thukhawm chuan Remna Ni (June 30) hman leh rawtin organising committee a din nghal a. Zofate inkhawmpui lian, Zofest pawh kumin chhung ngeia Lamka (Churachandpur), Manipur-a neih tura hmalak mek a nih thu an sawi bawk.