Mizoram sorkar forest department-a Principal Chief Conservation of Forest (PCCF) thupek angin DFO-ten NHIDCL hnathawh an enfiahnaah forest clearance hmu loa kawng an lai tih leh a hmun loah leivung an paih nasa tih hmuh a ni a, Mizoram (Forest) Act leh The Forest (Conservation Act) an bawhchhiat avangin hmun hrang hrangah an hnathawhte chu chawlhsan tura hriattir an ni.
PCCF Jitendra Kumar-a’n Aizawl, Lunglei, Champhai, Tlabung leh Thenzawl DFO te chu NHIDCL hnuaia hnathawh mekte a hmuna endik tur leh dan an bawhchhia a nih chuan an hnathawh lai a rang thei ang bera tawptir turin a hriattir a, thupek bawhzuiin DFO-ten hma an la.
Tlabung DFO chuan May 30, 2022 khan NHIDCL-in National Highway 302 Phairuang leh Tuichawnga 2-lane an siam mek chu endikin hnathawktu company-ten leivung paihna hmun ni loah an paih te, leivung an sawngbawl dan a mumal lo tih leh Gomari leh Teak te thuneitu hriatpuina loin contractor-in kawng zauh nan a kit tihte a hmu chhuak.
Hengte hi The Forest (Conservation) Act, 1980/The Environment (Protection) Act, 1986/The Mizoram Forest Act, 1955 te bawhchhiatna an nih avangin an hnathawh chu chawlhsan tur leh dan an bawhchhe lo a ni tih finfiahna pe turin a hriattir.
Thenzawl DFO pawhin National Highway 54, Aizawl – Tuipang kawng siam mekah road project Package-2 leh Chhiatlang-Serchhip Bypass (Package-I) siam nan Stage – I approval an hmu lo a ni tih finfiahin, Stage – I approval of Forest Clearance pawh nei lova NHIDCL-in hna an tan ngawt hi Forest Conservation Act, 1980 bawhchhiatna a ni.
Heng bakah leivung an sawngbawl dan a mumal loh avangin environment nasa taka an tichhia tih finfiah a nih bawk avangin NH-54 road project viltu, RO Seling PMU, NHIDCL leh RO, Lunglei PMU, NHIDCL te chu an hnathawh chawlhsan turin a hriattir bawk.
Champhai DFO-in an huam chhunga kawng sial hnathawhte chu chawlhsan nghal turin NHIDCL-te a hriattir bawk a. Kawng laihna leivung an paih that loh avanga harsatna tawktute hnenah zangnadawmna pe turin a hriattir bawk.
NHIDCL hotute hnenah Champhai DFO-in stay order a pekah hian National Highway 6 kawng zauh nana Tuivawl Riverine Reserve Forest chhunga hna thawk turin hnathawh phalna lak a ngai a nih thu a hriattir tawh chungin tihhlawhtlin a awm lo tih tar langin, kawng siam avanga chhiatna thleng avangin Green India Mission GIM) hnuaia Puilo VFDC te compensation Rs. 3,51,636 pe tur a tih a lo nih tawh bawk thu a tarlang.
Forest department hotute chuan NHIDCL hnathawh an enfiaha dan an zawm lo tih an finfiahnate chu sorkar laipui hotute hnenah an thlen tur thu The Zozam Times an hrilh a, hetianga enviroment tichhe zawnga an chet avang hian an phu tawk hremna an hmuh ngei theih nan hmalak ngei an tum thu an sawi bawk a ni.
Ruatfela Nu hovin duh lohna lantir
Social Activist Vanramchhuangi (Ruatfela Nu) chuan nimin khan Lunglei District Commissioner pisa kawtah National Highways & Infrastructure Development Corporation Limited (NHIDCL) hnathawktuten kawngpui laihna leivung paih avanga lui leh ramngaw a tihchhiat duh lohna a lantir.
Ruatfela Nu hi Lunglei Thalai Pawl (LTP), Mizoram Zirlai Pawl (MZP), Mizo Students’ Union (MSU) leh mi thahnemngaiten an tawiawm a ni.
LTP chuan an district huam chhungah hma an lo lak tawh thin angin Ruatfela Nu hmalakna hi thlawp ringawt loin an bawhzui zel dawn tih an sawi a. Ram leh hnam hma lam hun atana pawimawh a nih avangin lui leh ngawte venhim kawnga pen chhuak turin Lunglei mipuite sawmin, kawngpui zauh hnain a paltlang huam chhunga ram neitute pawh hma lam hun dawn chunga lui leh ngaw te, nungchate pawisa tlemte nena thleng lo turin an ngen tih an sawi.
LTP-in nimin vek khan DC Kulothungan A leh Divisional Forest Officer (DFO) hnenah NHIDCL kawng laituten dan an zawm loh chungchangah a rang thei ang bera hma la tura ngenna lehkha an thehlut nghal bawk.
Lunglei DC chuan LTP hruaitute chu hun remchang dapa NHIDCL kawng laihna leivung paihnate chu a hmun ngeia enfiah turin a tul dan azira hma an lak tur thu te; mi mal emaw, pawl emaw, hemi chungchang a finfiahna nei chuan a hnenah complain zel tura tiin, Disaster Management Act, 2005 hmanga hma lak zel a nih tur thu a lo hrilh.
DFO pawhin NH54 leh NH302 huam chhunga forest range-ah te danin a phut angin hma an lak ve zel thu te, DC hoa a hmunhma enfiah leh hnathawh mek ‘stay order’ pek an nihna te zawm a hlawh em tihte enfiah hunah tel ve ngei an tum thu te a lo hrilh ve bawk.